ឥណ្ឌូនេស៊ីបានព្យាយាមស្វែងរកការពន្យល់ពីក្រសួងការបរទេសអាមេរិក បន្ទាប់ពីប្រទេសនេះបានបដិសេធមិនឲ្យប្រមុខកងទ័ពឥណ្ឌូនេស៊ីជាន់ទឹកដីអាមេរិក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters ដោយដកស្រង់សម្ដីរបស់មន្ត្រីយោធាឥណ្ឌូនេស៊ី។
អគ្គមេបញ្ជាការកងទ័ពឥណ្ឌូនេស៊ី លោកឧត្ដមសេនីយ៍ Gatot Nurmantyo គ្រោងនឹងឡើងយន្តហោះកាលពីថ្ងៃសៅរ៍សប្ដាហ៍មុន នៅពេលក្រុមហ៊ុនអាកាសចរណ៍ បានផ្ដល់ដំណឹងដល់លោកថា ផ្នែកការពារព្រំដែន និងគយអាមេរិក បានបដិសេធមិនឲ្យរូបលោកជាន់ទឹកដីអាមេរិកនោះឡើយ។ នេះដោយយោងតាមអ្វីដែលអ្នកនាំពាក្យយោធាឥណ្ឌូនេស៊ី លោក Wuryanto បានថ្លែងនៅក្នុងសន្និសីទសារព័ត៌មានមួយនៅទីក្រុងហ្សាកាតា។
អ្នកនាំពាក្យរូបនេះ បាននិយាយថា អគ្គមេបញ្ជាការយោធាឥណ្ឌូនេស៊ី គ្រោងធ្វើដំណើរទៅអាមេរិក ទៅតាមការអញ្ចើញរបស់ឧត្ដមសេនីយ៍ Joseph F Dunford Jr ដែលជាប្រធានសេនាធិការចម្រុះកងទ័ពអាមេរិក ដើម្បីចូលរួមសន្និសីទប្រមុខការពារជាតិស្ដីពីការប្រយុទ្ធប្រឆាំងនឹងការចលនាហឹង្សាជ្រុលនិយម ដែលគ្រោងរៀបចំធ្វើឡើងនៅទីក្រុងវ៉ាស៊ីងតោន។
មន្ត្រីយោធាឥណ្ឌូនេស៊ី ប្រាប់ថា ពុំបានដឹងពីមូលហេតុដែលអាមេរិកមិនឲ្យប្រមុខកងទ័ពឥណ្ឌូនេស៊ីចូលទៅកាន់ប្រទេសខ្លួននោះឡើយ ហើយលោកបន្ថែមថា ប្រមុខកងទ័ពឥណ្ឌូនេស៊ី មិនមានបញ្ហាអ្វីនោះឡើយ អំឡុងពេលធ្វើដំណើរទៅអាមេរិក កាលពីខែកុម្ភៈឆ្នាំមុន។
រដ្ឋមន្ត្រីការបរទេសឥណ្ឌូនេស៊ី បានប្រាប់អ្នកយកព័ត៌មានថា ឥណ្ឌូនេស៊ីបានស្នើទៅអាមេរិក ក្រសួងការបរទេសអាមេរិក ព្រមទាំងស្ថានទូតអាមេរិកប្រចាំនៅហ្សាកាតា ឲ្យបញ្ជាក់អំពីបញ្ហានេះ ហើយរហូតមកដល់ពេលនេះ នៅមិនទាន់ទទួលបានការឆ្លើយតបនៅឡើយ៕