អតីតអគ្គលេខាធិការអង្គការសហប្រជាជាតិ លោក បាន គីមូន បានលើកឡើងនៅថ្ងៃនេះថា ប្រធានាធិបតីអាមេរិក លោក ដូណាល់ ត្រាំ កំពុងឈរនៅលើចំណុចខុសនៅក្នុងប្រវត្តិសាស្ត្រ ក្នុងការដកខ្លួនចេញពីកិច្ចព្រមព្រៀងទីក្រុងប៉ារីសស្ដីពីអាកាសធាតុ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
អតីតប្រមុខអង្គការសហប្រជាជាតិរូបនេះ បានថ្លែងនៅឯទីក្រុងឡុងដ៍នៅថ្ងៃនេះថា លោកមានកង្វល់យ៉ាងជ្រាលជ្រៅអំពីអ្វីដែលប្រធានាធិបតីអាមេរិក បានប្រកាសថា អាមេរិកនឹងដកខ្លួនចេញពីកិច្ចព្រមព្រៀងទីក្រុងប៉ារីសនេះ។
ថ្លែងនៅក្រៅវេទិកាសន្តិភាពនៅទីក្រុងឡុងដ៍ លោក បាន គីមូន បានលើកឡើងថា លោកកំពុងតែនិយាយថា ទស្សនវិស័យរបស់លោក គឺជានយោបាយមើលឃើញរយៈពេលខ្លី ជាការមិនទទួលខុសត្រូវខាងសេដ្ឋកិច្ច និងមិនត្រឹមត្រូវតាមលក្ខណៈវិទ្យាសាស្ត្រ។ លោក បាន គីមូន អះអាងថា លោក ត្រាំ កំពុងស្ថិតលើកំហុសឆ្គង។
បើទោះបីជាលោក ត្រាំ សម្រេចដកខ្លួនចេញពីកិច្ចព្រមព្រៀងទីក្រុងប៉ារីសស្ដីពីបម្រែបម្រួលអាកាសធាតុនោះក៏ដោយ ក៏លោក បាន គីមូន នៅតែជឿជាក់ថា យុទ្ធនាការរបស់សង្គមស៊ីវិលអាមេរិក នឹងបន្តផ្ដល់តម្លៃលើកិច្ចព្រមព្រៀងនិយាយអំពីបញ្ហាបរិស្ថាននេះ៕
