ក្រសួងការបរទេសអាមេរិក បាននិយាយថ្ងៃនេះថា អាមេរិកនឹងចាត់វិធានការ និងពិចារណានូវការដាក់ទណ្ឌកម្មបន្ថែមទៀត ជុំវិញការប្រព្រឹត្តទៅលើជនជាតិភាគតិចមូស្លីមរ៉ូហ៊ីងយ៉ា នៅក្នុងប្រទេសភូមា ក្នុងនោះមានទាំងការដាក់ទណ្ឌកម្មនៅក្រោមច្បាប់សិទ្ធិមនុស្សរបស់ខ្លួន។ នេះដោយយោងទៅតាមសេចក្ដីរាយការណ៍របស់សារព័ត៌មានសិង្ហបុរី Channel News Asia។
ក្រសួងការបរទេសអាមេរិក បាននិយាយក្នុងសេចក្ដីថ្លែងការណ៍របស់ខ្លួនថា អាមេរិកមានក្ដីកង្វល់យ៉ាងខ្លាំងចំពោះព្រឹត្តិការណ៍ថ្មីនៅរដ្ឋរ៉ាក់ឃីនរបស់ភូមា និងអំពើហឹង្សា ការរំលោភបំពានដ៏សោកសង្រេងលើជនជាតិរ៉ូហ៊ីងយ៉ា និងសហគមន៍ដទៃទៀត។
ក្រសួងការបរទេសអាមេរិកបានលើកឡើងបន្តថា វាតម្រូវថា បុគ្គល ឬនីតិបុគ្គលដែលទទួលខុសត្រូវលើអំពើឃោឃៅ ក្នុងនោះមានបុគ្គលមិនមែនរដ្ឋ និងសមាជិកផងដែរ ត្រូវចាប់ដាក់ឲ្យទទួលខុសត្រូវ។
ក្រសួងនេះបន្ថែមថា អាមេរិកនឹងដកជំនួយយោធាពីភូមា និងមន្ត្រីដែលជាប់ពាក់ព័ន្ធនឹងអំពើហឹង្សាប្រឆាំងនឹងជនជាតិរ៉ូហ៊ីងយ៉ា៕
