សារព័ត៌មានល្បីៗលើពិភពលោក ដែលមានប្រភពពីប្រទេសសេរី បានប្រតិកម្មតវ៉ា ករណីដែលអាជ្ញាធរចិន បានរារាំង បង្កការលំបាកដល់ពួកគេក្នុងការចូលយកព័ត៌មាននៅក្នុងពិធីតែងតាំងនិងការថ្លែងសាររបស់ លោកស៊ី ជីនពីង។
ចិនបានធ្វើសមាជដើម្បីបូកសរុបលទ្ធផលការងារ៥ឆ្នាំកន្លងទៅនេះ និងរៀបចំជ្រើសរើសមេដឹកនាំថ្មីសម្រាប់៥ឆ្នាំបន្តទៀត ដែលប្រកាសឲ្យប្រព័ន្ធផ្សព្វផ្សាយចូលរួមតាមដាន ដើម្បីបង្ហាញពីការធ្វើសកម្មភាពដោយបើកចំហ និងមានតម្លាភាព។
ប៉ុន្តែសារព័ត៌មានល្បីៗរបស់លោកខាងលិច បានតវ៉ាថា អាជ្ញាធរបានបង្កការរំខានដល់ពួកគេក្នុងការយកព័ត៌មាននៅក្នុងពិធីប្រកាសសមាសភាពគណៈកម្មាធិការជាន់ខ្ពស់នៃបក្សកុម្មុនីស្តចិននៅថ្ងៃពុធនេះ។ នេះបើតាមសារព័ត៌មាន The Guardian។
សារព័ត៌មានដែលផ្ទុះការតវ៉ាទាំងនោះរួមមាន BBC, the Financial Times, the Economist, the New York Times និង the Guardian ជាដើម។ ពួកគេចោទថា អាជ្ញាធរចិនបង្កការរំខានដល់ពួកគេនោះមិនបានពន្យល់មូលហេតុច្បាស់លាស់នៃការរារាំងនោះទេ។
ក្នុងសេចក្តីថ្លែងការណ៍របស់អ្នកសារព័ត៌មានបរទេសបានលើកឡើងថា សន្និសីទសារព័ត៌មាន គឺជាព័ត៌មានសំខាន់ពាក់ព័ន្ធជាមួយមេដឹកនាំកំពូលរបស់ចិន ហើយជាពេលសំខាន់ដែលមេដឹកនាំកំពូលទាំងនេះផ្ញើសារតាមប្រព័ន្ធផ្សព្វផ្សាយ។ ពួកគេបន្តថា ការរារាំងពីអាជ្ញាធរចិនមិនឲ្យអ្នកព័ត៌មានចូលរួមនេះគឺជាបំពានដល់សេរីភាពរបស់អ្នកព័ត៌មាន៕