ក្រុមអ្នកវិទ្យាសាស្ត្រចិន បានប្រើប្រាស់វិស្វកម្មហ្សែនដើម្បីចិញ្ចឹមជ្រូកបែបថ្មី ដោយជ្រូកបង្កាត់នេះ មានកម្រិតភាពធាតុតិចជាង ២៤ភាគរយ បើធៀបនឹងជ្រូកធម្មតា។ នេះដោយយោងតាមសេចក្ដីរាយការណ៍របស់សារព័ត៌មាន Channel News Asia។
សារព័ត៌មាននេះចុះផ្សាយបន្តថា វិស្វកម្មហ្សែននេះ មានសារៈសំខាន់ក្នុងការជួយដល់កសិករឲ្យសន្សំសំចៃធនធានខ្ពស់នៅក្នុងការចិញ្ចឹមជ្រូក។
វិស្វកម្មហ្សែននេះ ត្រូវបានចុះផ្សាយនៅក្នុងអត្ថបទស្រាវជ្រាវមួយបោះពុម្ពផ្សាយកាលពីថ្ងៃទី២៣ ខែតុលា នៅលើព្រឹត្តិបត្របណ្ឌិតសភាវិទ្យាសាស្ត្រជាតិ។
នៅក្នុងសំណេរស្រាវជ្រាវនោះ ក្រុមអ្នកវិទ្យាសាស្ត្រចិន បាននិយាយថា ជ្រូកសម័យទំនើបខ្វះហ្សែនម្យ៉ាងហៅថា UCP1 ជាប្រភេទហ្សែនមាននៅក្នុងសត្វជាច្រើនដែលចិញ្ចឹមកូនដោយទឹកដោះ។ កង្វះហ្សែនប្រភេទនេះ ធ្វើឲ្យជ្រូកងាយនឹងឆាប់ធាត់។
ក្រុមអ្នកវិទ្យាសាស្ត្រចិន បានចាក់បញ្ចូលហ្សែនកណ្ដុរទៅក្នុងកោសិកាជ្រូក ហើយបន្ទាប់មកប្រើប្រាស់កោសិកាទាំងនោះបង្កើតជាអំប្រ៊ីយ៉ុងជ្រូកបង្កាត់ចំនួន ២៥៥៣ ដែលក្រុមអ្នកវិទ្យាសាស្ត្រចាក់វាបញ្ចូលក្នុងខខ្លួនមេជ្រូក។ មេជ្រូក ៣ក្បាល បានផើម និងបង្កើតបានកូនជ្រូក ១២ក្បាល។
របាយការណ៍ស្រាវជ្រាវនិយាយថា នៅពេលកូនជ្រូកនោះអាយុបាន ៦ខែ ជ្រូកនោះត្រូវបានគេកាប់សាច់យកទៅត្រួតពិនិត្យ ហើយរកឃើញថា សរីរាង្គ និងសាច់ជ្រូកទាំងនោះ មានលក្ខណៈធម្មតា។ ជ្រូកឈ្មោលមួយក្បាល ត្រូវបានគេរាយការណ៍ថា អាចបន្តពូជបានធម្មតា។
ក្រុមអ្នកវិទ្យាសាស្ត្របាននិយាយក្នុងរបាយការណ៍ស្រាវជ្រាវនោះថា ជ្រូកទាំងនោះ បង្ហាញនូវសមត្ថភាពកាន់តែប្រសើរក្នុងការរក្សាកម្ដៅក្នុងខ្លួន បញ្ចុះសារធាតុខ្លាញ់ក្នុងខ្លួន និងបង្កើនភាគរយសាច់ជ្រូក។
របាយការណ៍នោះបាននិយាយថា ការស្រាវជ្រាវនេះ អាចជាធនធានដ៏តម្លៃសម្រាប់ផលិតកម្មកសិកម្មផ្នែកចិញ្ចឹមសត្វជ្រូក និងកាត់បន្ថយការខាតបង់ថវិកា៕
ប្រធានក្រុមអ្នកស្រាវជ្រាវនៃវិទ្យាស្ថានឧទ្យានវិទ្យានៅបណ្ឌិតសភាវិទ្យាសាស្ត្រចិនក្នុងទីក្រុងប៉េកាំង លោក ចាវ ជៀនកួ បានប្រាប់ប្រព័ន្ធផ្សព្វផ្សាយអាមេរិកថា៖ «នេះគឺជាបញ្ហាធំសម្រាប់ឧស្សាហកម្មជ្រូក… ជ្រូកអាចរក្សាកម្ដៅក្នុងខ្លួនកាន់តែល្អច្រើន ដែលមានន័យថា ជ្រូកអាចសម្របខ្លួនបានកាន់តែប្រសើរនៅក្នុងសីតុណ្ហភាពត្រជាក់»៕