ក្រុមហ៊ុនជាង ១៥០០នាក់ បានសម្រេចចាកចេញពីតំបន់កាតាឡូណា នៅភាគឦសានប្រទេសអេស្ប៉ាញ ចំពេលមានក្ដីបារម្ភអំពីការប្រកាសឯករាជ្យរបស់តំបន់នេះផ្ដាច់ចេញពីប្រទេសអេស្ប៉ាញ។ នេះដោយយោងតាមសេចក្ដីរាយការណ៍ទីភ្នាក់ងារព័ត៌មានរដ្ឋចិនស៊ិនហួរ។
ដោយបានដកស្រង់សម្ដីមន្ត្រីនៅមន្ត្រីចុះបញ្ជីក្រុមហ៊ុននៅអេស្ប៉ាញ ទីភ្នាក់ងារព័ត៌មាននេះ បានរាយការណ៍បន្តថា នៅចន្លោះថ្ងៃទី២ ដល់ថ្ងៃទី២៤ ខែតុលានេះ ក្រុមហ៊ុនឯកជនសរុប ១៥០១ស្ថាប័ន បានសម្រេចចិត្តចាកចេញពីតំបន់កាតាឡូណា ហើយគ្រាន់តែថ្ងៃពុធម្សិលមិញនេះ ក្រុមហ៊ុនឯកជន ១០៧ស្ថាប័ន បានសម្រេចផ្លាស់ប្ដូរការិយាល័យរបស់ខ្លួនទៅកន្លែងផ្សេង ចាកចេញពីតំបន់កាតាឡូណា។
ការសម្រេចបែបនេះរបស់បណ្ដាក្រុមហ៊ុនទាំងនោះ បានកើតក្រោយពីរដ្ឋាភិបាលតំបន់កាតាឡូណា បានរៀបចំការបោះឆ្នោតប្រជាមតិកាលពីថ្ងៃទី០១ ខែតុលា និងបានប្រកាសឯករាជ្យតំបន់នេះ ចាកចេញពីប្រទេសអេស្ប៉ាញ។
ការបោះឆ្នោតប្រជាមតិនោះ ត្រូវបានតុលាការធម្មនុញ្ញអេស្ប៉ាញចាត់ទុកជាការបោះឆ្នោតដោយខុសច្បាប់ ដោយថា បានរំលោភលើរដ្ឋធម្មនុញ្ញប្រទេស។
ក្រោយពីការបោះឆ្នោតប្រជាមតិហើយ រដ្ឋាភិបាលក្រុងម៉ាឌ្រីត បានអនុម័តច្បាប់មួយ ដែលធ្វើឲ្យមានភាពងាយស្រួលដល់ក្រុមហ៊ុនឯកជន ក្នុងការចាកចេញពីតំបន់កាតាឡូណា ហើយផ្លាស់ប្ដូរការិយាល័យរបស់ពួកគេទៅកន្លែងផ្សេងទៀតនៅក្នុងប្រទេសអេស្ប៉ាញ៕