តុលាការប្រទេសប៉ាគីស្ថាន នៅថ្ងៃនេះ បានចេញដីការចាប់ខ្លួនអតីតនាយករដ្ឋមន្ត្រីត្រូវបានបណ្ដេញចេញពីតំណែង លោក ណាវ៉ាស់ ហ្សារីហ្វ ពាក់ព័ន្ធនឹងអំពើពុករលួយ ២ករណី ដែលត្រូវបានលេចធ្លាយនៅលើកាសែតប៉ាណាម៉ា។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP ដែលបានដកស្រង់សម្ដីមេធាវីការពារក្ដីឲ្យអតីតនាយករដ្ឋមន្ត្រីរូបនេះ។
លោក ហ្សារីហ្វ សព្វថ្ងៃនេះ កំពុងរស់នៅក្នុងទីក្រុងឡុងដ៍ជាមួយភរិយារបស់លោកគឺអ្នកស្រី កាលស៊ុម ខណៈដែលអ្នកស្រីស្ថិតក្រោមការព្យាបាលជំងឺមហារីក ហើយលោក ហ្សារីហ្វ នៅមិនទាន់បានវិលត្រឡប់ទៅប្រទេសប៉ាគីស្ថានវិញនៅឡើយទេ ចាប់តាំងពីលោកត្រូវបានចោទប្រកាន់នៅក្នុងសំណុំរឿងពុករលួយនៅដើមខែនេះ។
លោក ហ្សាហ្វៀរ ខាន់ មេធាវីម្នាក់ក្នុងចំណោមេធាវីការពារក្ដីឲ្យលោក ហ្សារីហ្វ បានប្រាប់ថា តុលាការបានចេញដីការចាប់ខ្លួនអតីតនាយករដ្ឋមន្ត្រីរូបនេះនៅថ្ងៃនេះ នៅក្នុងសំណុំរឿងពុករលួយ ២ករណី ហើយគ្រោងជម្រះក្ដីរហូតដល់ថ្ងៃទី០៣ ខែវិច្ឆិកា។
កាលពីចុងខែកក្កដាកន្លងមក តុលាការកំពូលបានបណ្ដេញលោក ហ្សារីហ្វ ពីតំណែង បន្ទាប់ពីមានការស៊ើបអង្កេតទៅលើការចោទប្រកាន់អំពីអំពើពុករលួយប្រឆាំងនឹងគ្រួសាររបស់លោក ធ្វើឲ្យលោកក្លាយជានាយករដ្ឋមន្ត្រីប៉ាគីស្ថានទី ១៥ ដែលត្រូវបានបណ្ដេញចេញពីតំណែងនៅមុនបញ្ចប់អាណត្តិ នៅក្នុងប្រវត្តិសាស្ត្ររយៈពេល ៧០ឆ្នាំរបស់ប្រទេសនេះ។
ការចោទប្រកាន់ប្រឆាំងនឹងលោក ហ្សារីហ្វ កើតចេញពីព័ត៌មានលេចធ្លាយនៅលើកាសែតប៉ាណាម៉ាកាលពីឆ្នាំមុន ដែលធ្វើឲ្យប្រព័ន្ធផ្សព្វផ្សាយផ្ដោតទៅលើជីវិតដ៏ហ៊ឺហា និងការកាន់កាប់អចលនទ្រព្យធំៗនៅទីក្រុងឡុងដ៍ពីសំណាក់គ្រួសាររបស់លោក។
លោក ហ្សារីហ្វ ត្រូវបានបណ្ដេញចេញពីតំណែងនៅក្នុងអាណត្តិដំបូងរបស់លោកនៅឆ្នាំ១៩៩៣ ជុំវិញការចោទប្រកាន់ពីការប្រព្រឹត្តអំពើពុករលួយ ហើយបន្ទាប់នៅឆ្នាំ១៩៩៩ លោកត្រូវតុលាការកាត់ទោសឲ្យជាប់គុកមួយជីវិត បន្ទាប់ពីលោកអាណត្តិទីពីររបស់លោក ត្រូវបានពួកយោធាបញ្ចប់។
ក្រោយរដ្ឋប្រហារពីពួកយោធា លោក ហ្សារីហ្វ ត្រូវបានអនុញ្ញាតឲ្យរស់នៅនិរទេសខ្លួននៅប្រទេសអារ៉ាប៊ីសាអ៊ូឌីត ហើយត្រឡប់ទៅប្រទេសប៉ាគីស្ថានវិញនៅឆ្នាំ២០០៧ មុននឹងក្លាយជានាយករដ្ឋមន្ត្រីអាណត្តិទី៣ នៅឆ្នាំ២០១៣៕