ប្រជាជនថៃរាប់ពាន់នាក់ បានចេញដើរនៅតាមផ្លូវនៅទីក្រុងបាងកក ដើម្បីតាមដានពិធីបូជាព្រះសពអតីតព្រះមហាក្សត្រ ភូមិបុល អាដុលយ៉ាតេជ នៅថ្ងៃនេះ ដោយអគារនានាត្រូវបានបំពាក់ទៅដោយទង់ពណ៌លឿង និងស្លាកកាន់ទុក្ខនៅតាមដងផ្លូវ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ក្រុមប្រជាជនកាន់ទុក្ខដែលស្ថិតក្នុងសម្លៀកបំពាក់ឈុតខ្មៅនោះ បានដេកនៅតាមផ្លូវនៅជិតរាជវាំងថៃកាលពីយប់មិញនេះ ដើម្បីតាមដានទិដ្ឋភាពបូជាព្រះសពស្ដេចថៃ ដែលចាប់ផ្ដើមនៅម៉ោង ៧ព្រឹកថ្ងៃនេះ។
ព្រះរាជពិធីបូជាព្រះសពស្ដេចថៃ ត្រូវបានរៀបចំឡើងតាមប្រពៃណីបុរាណ ហើយនឹងមានពិធីដង្ហែនានាពីព្រះរាជវាំងទៅវាលមេរុ ដែលត្រូវបានរៀបចំឡើងនៅចម្ងាយ ៥០ម៉ែត្រពីព្រះរាជវាំង។
ក្រុមមន្ត្រីរៀបចំព្រះរាជពិធីបុណ្យនេះ បាននិយាយថា ព្រះសពស្ដេចថៃ ត្រូវដង្ហែចេញពីព្រះរាជវាំងទៅកាន់វាលមេរុតាមរយៈរាជរថពណ៌មាស។ ថវិកាសរុប ៩០លានដុល្លារ ត្រូវបានគេចាត់ចែងសម្រាប់ព្រះរាជពិធីបុណ្យនេះ ដែលនេះគឺជាការចំណាយមិនឃើញនៅក្នុងប្រទេសថៃ។
ស្ដេច ភូមិបុល អាដុលយ៉ាតេជ ដែលត្រូវបានប្រជាជនថៃហៅថា ស្ដេចរាមាទី៩ នោះ បានសោយទីវង្គតកាលពីខែតុលាឆ្នាំមុន នៅក្នុងព្រះជន្មាយុ ៨៨ឆ្នាំ បន្ទាប់ពីសោយរាជ្យអស់រយៈពេល ៧ទសវត្សរ៍។ ស្ដេចអង្គនេះបានដើរតួយ៉ាងសំខាន់នៅក្នុងការថែរក្សាស្ថេរភាពប្រទេស អំឡុងពេលមានចលាចលនយោបាយ៕
