ប្រធានាធិបតីសហរដ្ឋអាមេរិកបានថ្លែងជាសាធារណៈ ប្រាប់ប្រជាពលរដ្ឋអាមេរិកថា ជាជម្រើសល្អប្រសើបំផុតមិនត្រូវជក់បារី និង ផឹកស្រានោះទេ ដែលនាំឲ្យប៉ះពាល់ដល់សុខភាព និង អាចមានហានិភ័យនៃគ្រោះថ្នាក់ផ្សេងៗកើតមានឡើង។
នៅក្នុងវិដេអូឃ្លីបមួយដែលសារព័ត៌មាន BBC ចុះផ្សាយនៅថ្ងៃនេះ លោកត្រាំ ថ្លែងថា បងប្រុសរបស់មិត្តភ័ក្តិលោក គឺជាមនុស្សមានទ្រព្យសម្បត្តិច្រើន និង ជាអ្នកដែលមានឥរិយាបថល្អនៅក្នុងសង្គម ប៉ុន្តែក្លាយជាមនុស្សមានបញ្ហាធ្ងន់ធ្ងរមួយដោយសារតែបញ្ហាញៀនស្រា។ លោកថា បុរសញៀនស្រាម្នាក់នោះបានប្រាប់រូបលោកថា ដើម្បីក្លាយជាមនុស្សល្អប្រពៃត្រូវជៀសវាងកុំឲ្យផឹកស្រា និង ជក់បារី។
ការថ្លែងរបស់លោក ត្រាំ នៅពេលនេះ ស្របពេលដែលលោកថា បញ្ហាសារធាតុញៀន កុំពុងធ្វើឲ្យតែធ្វើឲ្យសហរដ្ឋអាមេរិកមានភាពអាមាស់ក្នុងវិស័យសុខភាពសារណៈ។ លោកក៏បានប្រកាសភាពអាសន្ននៃសារធាតុញៀនកំពុងបំផ្លាញសុខភាព និង អាយុជីវិតពលរដ្ឋអាមេរិកគឺសារធាតុបានញៀនសម្លាប់ពលរដ្ឋអាមេរិកអស់ចំនួនជាង១៤០នាក់ក្នុង១ថ្ងៃ។
សារធាតុញៀនដែលអាមេរិកកំពុងតែប្រកាសអាសន្ននេះរួមទាំងស្រា បារី ថ្នាំញៀន និង ថ្នាំដែលមានសារធាតុញៀនប្រើប្រាស់សម្រាប់ព្យាលបាលជំងឺផងដែរ។
អាជ្ញាធរអាមេរិកបានលើកឡើងថា បញ្ហាការញៀនស្រា បង្កជាគ្រោះថ្នាក់ខ្លាំងក្លាដល់អ្នកដែលមានកាំភ្លើង និង អ្នកដែលបើកបរនៅលើដងផ្លូវ។
លោកត្រាំបានប្រកាសឲ្យរដ្ឋនានាទាំងអស់ប្រើប្រាស់ថវិកា ដើម្បីធ្វើសកម្មភាពទប់ការរាលដាលជំងឺញៀន ដែលកំពុងតែបង្កជាបញ្ហានៅសហរដ្ឋអាមេរិក។ លោកត្រាំថ្លែងថា ដើម្បីដោះស្រាយបញ្ហានេះបានត្រូវមានការប្រឹងប្រែងពីស្ថាប័នពាក់ព័ន្ធ ត្រូវការពេលវេលា និង ត្រូវការថវិកាដើម្បីធ្វើសកម្មភាព៕
