រដ្ឋមន្ត្រីការបរទេសសហរដ្ឋអាមេរិកកាលពីម្សិលមិញជំរុញឲ្យមេបញ្ជាការយោធា មីយ៉ាន់ម៉ា ជួយដោះស្រាយបញ្ជប់អំពើហិង្សាលើជនជាតិភាគតិចរ៉ូហ៊ីងយ៉ានៅក្នុងរដ្ឋរ៉ាឃីន។
ការជំរុញនេះធ្វើឡើងតាមទូរសព្ទក្នុងពេលសន្ទនារវាងរដ្ឋមន្ត្រីការបរទេសអាមេរិកលោក រិច ធាឡឺសិន និង មេបញ្ជាការយោធា មីយ៉ាន់ម៉ា លោក មីង អ៊ុងឡាំងកាលពីថ្ងៃព្រហស្បតិ៍ម្សិលមិញ។ នេះបើតាមសារព័ត៌មាន South China Morning Post។
អាមេរិកស្នើឲ្យយោធាគាំទ្រដល់រដ្ឋាភិបាលមីយ៉ាន់ម៉ាក្នុងការស្វែងរកដំណោះស្រាយបញ្ឈប់អំពើហិង្សាលើជនជាតិរ៉ូហ៊ីងយ៉ា និង ធានាពីសុវត្ថិភាពដល់អ្នកទាំងនោះ ក្នុងការវិលត្រលប់ចូលភូមិដ្ឋានរបស់ពួកគេវិញដោយមិនមានការភ័យខ្លាច។
ជំរុញរបស់លោក រិច ធាឡឺសិននេះ ធ្វើឡើងក្នុងពេលដែលលោកធ្វើដំណើរទស្សនកិច្ចនៅក្នុងប្រទេសឥណ្ឌា ជាប្រទេសដែលមានព្រំប្រទល់ជាប់ជាមួយប្រទេសមីយ៉ាន់ម៉ា។
ហិង្សាដែលផ្ទុះឡើងកាលពីខែសីហាកន្លងទៅ គឺយោធាមីយ៉ាន់បើកការបង្ក្រាបលើជនជាតិភាគតិច បណ្តាលឲ្យ ជនជាតិរ៉ូហ៊ីងយ៉ាកាន់សាសនា ឥស្លាមទាំងនេះ ជាង ៦០០ ០០០នាក់ រត់គេចចេញពីប្រទេសមីយ៉ាន់ម៉ាឆ្លងដែនចូលក្នុងប្រទេសបង់ក្លាដេស។ របាយការពីអង្គការសិទ្ធិមនុស្សបង្ហាញបន្តបន្ទាប់ថា យោធាបានបាញ់សម្លាប់ ធ្វើទារុញកម្ម ដុតផ្ទះ និង រំលោភផ្លូវភេទលើស្ត្រី និង កុមារផងដែរ។
ទោះយ៉ាងណា របាយការណ៍ចោទប្រកាន់ទាំងនេះ គឺយោធាមីយ៉ាន់ម៉ាបានច្រានចោលជាញឹកញាប់ថា ពួកគេវាយបង្ក្រាបនេះ គឺផ្តោតតែលើក្រុមឧទ្ធាមមិនបានសំដៅលើជនស៊ីវិលនោះទេ ។ យោធាមីយ៉ាន់ម៉ា លើកឡើងថា ដំបូងឡើយក្រុមបះបោរជនជាតិរ៉ូហ៊ីយ៉ាបានបើកការវាយប្រហារលើប៉ុស្តិ៍នគរបាលរបស់យោធា ទើបមានការវាយបកត្រលប់វិញ។
កាលពីដើមសប្តាហ៍នេះ សហរដ្ឋអាមេរិកបានប្រកាសដកជំនួយផ្នែកយោធាពីមីយ៉ាន់ម៉ាដោយចោទថា យោធាបានប្រព្រឹត្តអំពើឃោរឃៅជនជាតិភាគតិច៕
