រដ្ឋាភិបាលអេស្ប៉ាញ បានសម្រេចបណ្ដេញមេដឹកនាំតំបន់កាតាឡូណា និងរំសាយសភាតំបន់នេះចោលកាលពីថ្ងៃម្សិលមិញនេះ ពោលគឺតែប៉ុន្មានម៉ោងប៉ុណ្ណោះ ក្រោយពីតំបន់នេះប្រកាសខ្លួនឯងជាប្រជាជាតិឯករាជ្យមួយ នៅអំឡុងពេលមានវិបត្តិនយោបាយដ៏ជ្រាលជ្រៅបំផុតនៅអេស្ប៉ាញ ចាប់តាំងពីប្រទេសនេះវិលត្រឡប់ទៅរកលទ្ធិប្រជាធិបតេយ្យវិញអស់រយៈពេល ៤ទសវត្សរ៍មក។ នេះយោងតាមការផ្សាយរបស់ទីភ្នាក់ងារព័ត៌មានអន្តរជាតិ។
នាយករដ្ឋមន្ត្រីអេស្ប៉ាញ លោក ម៉ារីយ៉ាណូ រ៉ាចយ បានថ្លែងតាមទូរទស្សន៍នៅថ្ងៃដែលតំបន់កាតាឡូណាប្រកាសឯករាជ្យថា ការបោះឆ្នោតជាថ្មីសម្រាប់តំបន់នេះ នឹងត្រូវរៀបចំធ្វើឡើងនៅថ្ងៃទី២១ ខែធ្នូខាងមុខ។
ក្រៅពីដកហូតតំណែងលោក Carles Puigdemont ពីតំណែងជាមេដឹកនាំតំបន់កាតាឡូណាហើយនោះ លោក រ៉ាចយ ក៏បានបណ្ដេញមេប៉ូលិសតំបន់នេះផងដែរ ហើយលោក រ៉ាចយ ថ្លែងថា បណ្ដាក្រសួងនានារបស់រដ្ឋាភិបាលកណ្ដាល នឹងកាន់កាប់ទៅលើរដ្ឋបាលនៅតំបន់កាតាឡូណា។
លោក រ៉ាចយ ថ្លែងថា អេស្ប៉ាញកំពុងឆ្លងកាត់ថ្ងៃដ៏សោកសៅ។ លោកថា គេត្រូវស្ដាប់ពលរដ្ឋកាតាឡូណាជាបន្ទាន់ ដើម្បីពួកគេអាចសម្រេចពីអនាគតរបស់ពួកគេ ហើយគ្មាននរណាម្នាក់អាចធ្វើសកម្មភាពក្រៅច្បាប់បាននោះឡើយ៕
