ស្ថិតនៅក្រោមសម្ពាធពីសភា រដ្ឋបាលប្រធានាធិបតី លោក ដូណាល់ ត្រាំ បានចេញផ្សាយយ៉ាងយឺតយ៉ាវនូវបញ្ជឈ្មោះក្រុមហ៊ុន និងទីភ្នាក់ងាររុស្ស៊ី កាលពីថ្ងៃម្សិលមិញនេះ ដែលត្រូវអនុវត្តតាមច្បាប់ទណ្ឌកម្មថ្មី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក ត្រាំ បានជំទាស់នឹងច្បាប់នេះ ដែលបានរឹតត្បិតលើអំណាចរបស់លោក ក្នុងការបន្ធូបន្ថយវិធានទណ្ឌកម្មដាក់លើប្រទេសរុស្ស៊ី ចំពោះតួនាទីរបស់ប្រទេសនេះបានលូកលាន់ចូលប្រទេសអ៊ុយក្រែន និងត្រូវបានគេចោទថា បានលូកលាន់ក្នុងនយោបាយអាមេរិកទៀត។
ប៉ុន្តែ លោក ត្រាំ បានចុះហត្ថលេខាទាំងរំគាស់ចិត្តទៅលើ «ច្បាប់ប្រឆាំងនឹងជនប្រឆាំងអាមេរិកតាមរយៈពេលទណ្ឌកម្ម» កាលពីខែសីហាកន្លងមក បន្ទាប់ពីក្រុមសមាជិកសភា បានអនុម័តច្បាប់នេះ ដោយមានការជំទាស់ច្រើន។
ស្ថិតនៅក្រោមច្បាប់នេះ ក្រសួងការបរទេសអាមេរិកមានកាតព្វកិច្ចបង្ហាញបញ្ជីឈ្មោះក្រុមហ៊ុនមានទំនាក់ទំនងនឹងយោធា និងទីភ្នាក់ងារចារកម្មរុស្ស៊ី នៅក្នុងរយៈពេល ៦០ថ្ងៃ។
ទីបំផុត កាលពីថ្ងៃព្រសហ្បតិ៍កន្លងមកនេះ ក្រសួងការបរទេសបានបញ្ជូនបញ្ជីឈ្មោះទៅសភា ដោយយឺតយ៉ាវដល់ទៅ ២៥ថ្ងៃឯណោះ ហើយក្រសួងបានផ្សព្វផ្សាយបញ្ជីឈ្មោះនោះនៅលើវេបសាយរបស់ខ្លួនកាលពីថ្ងៃម្សិលមិញនេះ។
ក្រុមហ៊ុនដែលជាប់ក្នុងបញ្ជីទណ្ឌកម្មនោះ សុទ្ធតែជាក្រុមហ៊ុនដែលមានជាប់ពាក់ព័ន្ធនឹងការនាំចេញសព្វាវុធរបស់រុស្ស៊ី ដូចជាក្រុមហ៊ុនផ្គត់ផ្គង់សម្ភារៈសឹក និងរថយន្ត Rosoboronexport និងក្រុមហ៊ុន Kalashnikov ជាដើម៕