បើរំឭកពីអនុស្សាវរីយ៍រវាងសហរដ្ឋអាមេរិក និង វៀតណាមកាលប្រមាណ៥០ឆ្នាំមុននៅក្នុងអំឡុងទសវត្សរ៍ឆ្នាំ៦០ និង ៧០នោះ គឺពេលនោះប្រទេសទាំងពីរកំពុងតែប្រើគ្រប់មធ្យោបាយដើម្បីសម្លាប់គ្នាទៅវិញទៅមក។
ក្រោយទទួលបានឯករាជ្យ១០ឆ្នាំគឺឆ្នាំ១៩៥៥ វៀតណាមបានផ្ទុះសង្គ្រាមឡើងហើយបែងចែកប្រទេសជាពីរគឺវៀតណាមខាងត្បូង និង វៀតណាមខាងជើង សង្គ្រាមជាតិសាសន៍មួយនេះបានបញ្ចប់ទៅវិញនៅឆ្នាំ១៩៧៥។
សង្គ្រាមកើតឡើងដោយសារឥទ្ធិពលនៃសង្គ្រាមត្រជាក់នេះ មានវត្តមានយោធាអាមេរិកនៅចន្លោះដើមឆ្នាំ១៩៦០ដល់ដើមឆ្នាំ១៩៧០។ វត្តមានរបស់អាមេរិករយៈពេលជាង១០ឆ្នាំនៃសង្គ្រាមនេះ ធ្វើឲ្យភាគីអាមេរិក និង វៀតណាមខូចខាតអស់យ៉ាងច្រើន។
របាយការណ៍របស់រដ្ឋាភិបាលវៀតណាមផ្សព្វផ្សាយនៅឆ្នាំ១៩៩៥ បានបង្ហាញថា នៅក្នុងអំឡុងសង្គ្រាមនោះ ជនស៊ីវិល និងយោធារបស់វៀតណាមជាង២លាននាក់បានស្លាប់ ចំណែកយោធា និងក្រុមការងាររបស់អាមេរិកជិត៦០ម៉ឺនបានស្លាប់។
ទន្ទឹមហេតុការណ៍ដែលធ្វើឲ្យមនុស្សស្លាប់តាមរូបភាពផ្សេងៗដោយសាហាវព្រៃផ្សៃនេះ ការឈឺចាប់ និង ជនរងគ្រោះថ្មីដោយសារតែឥទ្ធិពលនៃសង្គ្រាមនោះនៅតែបន្តកើតមានលើប្រជាពលរដ្ឋវៀតណាមគឺសារធាតុគីមីរបស់អាមេរិក។
តាមការស្រាវជ្រាវរបស់វិទ្យាស្ថានស្រាវជ្រាវបច្ចេកវិទ្យា និង ទូរគមនាគមន៍មានមូលដ្ឋានក្នុងទីក្រុងហាណូយ បានចុះផ្សាយនៅគេហទំព័រ The Conversation កាលពីដើមខែតុលា ឆ្នាំ២០១៧កន្លងទៅនេះ បង្ហាញថា អាមេរិកបានទម្លាក់គ្រាប់ចំនួន៨លានតោន និង បាញ់សារធាតុគីមីមានឈ្មោះថា ទីភ្នាក់ងារពណ៌ទឹកក្រូច(Agent Orange)ចំនួន៧៣ពាន់លានលីត្រ លើប្រទេសវៀតណាម។
ការសិក្សារកឃើញទៀតថា ក្រោយសង្គ្រាម៤០ឆ្នាំពលរដ្ឋវៀតណាមចន្លោះពី ២លាន១សែន ទៅ ៤លាន ៨សែននាក់ រងផលប៉ះពាល់ដោយសារធាតុគីមីបន្សល់ពីសម័យសង្គ្រាមនោះ។ ចំណែកទឹក ដី និង ខ្យល់ខូចគុណភាព ក្នុងនោះដីជាង ១ លាន ៧សែនហិកតា ស្ថិតនៅក្នុងខេត្តចំនួនខេត្តចំនួន៣០ខូចគុណភាព ធ្វើកសិកម្មមិនបាន។
រហូតដល់បច្ចុប្បន្នទារកកើតថ្មីនៅក្នុងប្រទេសវៀតណាមនៅតែជួបបញ្ហាមិនប្រក្រតីដូចជា បញ្ហាខួរក្បាល បាត់បង់ផ្នែកណាមួយនៃរាងកាយជាដើម។
បច្ចុប្បន្នវៀតណាម និង អាមេរិកកំពុងតែរូមគ្នាបន្តដោះស្រាយបន្សាបសារធាតុគីមីដែលបន្សល់ទុកពីសម័យសង្គ្រាម គឺភាគីទាំងពីរបញ្ជាក់ថា បញ្ហាសារធាតុគីមីនឹងត្រូវបោសម្អាតអស់នៅដើមឆ្នាំ២០១៨ខាងមុខនេះ។
អតីតគូសត្រូវកាលពី៥០ឆ្នាំមុន គឺមួយរយៈកាលចុងក្រោយនេះបង្កើនការទំនាក់ទំនងគ្នារីកចម្រើនស្ទើរគ្រប់វិស័យធ្វើហាក់ដូចជាមិនធ្លាប់មានអ្វីកើតឡើងកាលពីអតីតកាលអញ្ចឹង។
នៅក្នុងរដ្ឋការបស់លោកអូ បាម៉ា ប្រធានាធិបតីទី៤៤របស់អាមេរិកគឺសម្រេចដកទណ្ឌកម្មដែលហាមលក់អាវុធឲ្យវៀតណាមចេញវិញ និង បានសាងសង់រោងចក្រថាមពលដើរដោយនុយក្លេអ៊ែឲ្យវៀតណាមថែមទៀតផង។ ចំណែកវិស័យទំនាក់ទំនងពាណិជ្ជកម្មប្រទេសទាំងពីរកើនឡើងជាលំដាប់។ក្រសួងការបរទេសវៀតណាមបញ្ជាក់ថា ពាណិជ្ជកម្មវៀតណាម និងអាមេរិកកើនដល់ ៥២,៣ ពាន់លានដុល្លារនៅឆ្នាំ២០១៦ ហើយកើនឡើង២០%រៀងរាល់ឆ្នាំ។
នៅក្នុងដំណើរទស្សនកិច្ចរបស់មេដឹកនាំអាមេរិកលោក ដូណល ត្រាំទៅកាន់ប្រទេសវៀតណាមនៅថ្ងៃទី១០ និង ១១ខែវិច្ឆិកានេះ គេរំពឹងថា នឹងមានបង្កើនទំហំសេដ្ឋកិច្ចបន្ថែមទៀត ខណៈបច្ចុប្បន្នវៀតណាមក្លាយជាប្រទេសដែលនាំចេញទំនិញទៅអាមេរិកច្រើនជាងគេក្នុងចំណោមប្រទេសសមាជិកអាស៊ាន ហើយអាមេរិកជាដៃគូពាណិជ្ជកម្មធំបំផុតរបស់វៀតណាម។
ការចាប់ដៃគ្នាណែនរវាងអាមេរិក និង វៀតណាមនៅពេលនេះ អ្នកវិភាគមួយចំនួនលើកឡើងថា នៅពីក្រោយហេតុផលសេដ្ឋកិច្ចគឺនយោបាយ ដោយសារប្រទេសទាំងពីរមានគូប្រជែងរួមគ្នាគឺប្រទេសចិន។
