មេដឹកនាំកាន់តំណែង៣៧ឆ្នាំនៅក្នុងប្រទេសហ្ស៊ីមបាវេ លោក រ៉ូប៉ឺត មូហ្គាបេ ប្រកាសកាលពីថ្ងៃអង្គារម្សិលមិញថា លោកសុខចិត្តលាលែងពីតំណែង ដើម្បីសេចក្តីសុខប្រជាពលរដ្ឋ និងការផ្ទេរអំណាចដោយសសន្តិវិធីមិនឲ្យមានអំពើហិង្សា។
នៅក្នុងលិខិតលាលែងពីតំណែងនោះ លោក មូហ្គាបេ លើកឡើងថា លោកធ្វើឡើងដើម្បីសេចក្តីសុខប្រជាពលរដ្ឋរបស់លោក ដើម្បីសន្តិភាព ការផ្ទេរអំណាចដោយរលូន និងមិនចង់ឲ្យមានអំពើហិង្សាកើតឡើងនៅក្នុងប្រទេសរបស់លោក។
សេចក្តីប្រកាសរបស់មេដឹកនាំវ័យ៩៣ឆ្នាំរូបនេះ ត្រូវបានគេយកទៅអាននៅក្នុងកិច្ចប្រជុំសភា និង ផ្សព្វផ្សាយជាសាធារណៈ ខណៈប្រជាពលរដ្ឋកំពុងប្រមូលផ្តុំនៅលើផ្លូវនានាដើម្បីបង្ហាញជំហរទាមទារឲ្យលោក មូហ្គាបេចុះចេញពីតំណែង។
លោក មូហ្គាបេ ត្រូវក្រុមយោធា ឃាត់ខ្លួនកាលពីថ្ងៃទី១៥ខែវិច្ឆិកា បន្ទាប់ពីមានជម្លោះនយោបាយផ្ទៃក្នុងនៃគគណបក្សកាន់អំណាច៕
