រដ្ឋាភិបាលកម្ពុជាបានសម្រេចបង្កើតក្រុមការងារចុះរៀបចំកិច្ចការសន្តិសុខ សុវត្ថិភាព សម្រាប់នាយករដ្ឋមន្ត្រី និងភរិយា នៅតាមគោលដៅប្រារព្ធពិធីក្នុងព្រះរាជាណាចក្រកម្ពុជា ខណៈស្ថានការនយោបាយកំពុងមានភាពតានតឹង។
ក្នុងសេចក្តីសម្រេចមួយចុះថ្ងៃទី២០តុលាឆ្នាំ២០១៧ ដែលវីអូឌីទើបទទួលបាន រដ្ឋាភិបាលកម្ពុជា បានសម្រេចបង្កើតក្រុមការងារចុះរៀបចំកិច្ចការសន្តិសុខ សុវត្ថិភាព ជូនលោកនាយករដ្ឋមន្ត្រី ហ៊ុន សែន និងភរិយា នៅគ្រប់គោលដៅ ដែលអ្នកទាំងពីរអញ្ចើញចូលរួមប្រារព្ធពិធីនានា ក្នុងព្រះរាជាណាចក្រកម្ពុជា ដោយនៅក្នុងសេចក្តីសម្រេចនោះ រដ្ឋាភិបាល បញ្ជាក់ថា នេះជាតម្រូវការចាំបាច់។
បើតាមសេចក្តីសម្រេចដដែល ក្រុមការងារសន្តិសុខចំនួន១៥នាក់ ដែលដឹកនាំដោយរដ្ឋលេខាធិការក្រសួងមុខងារសាធារណៈ លោក យូ ស៊ុនឡុង និងអគ្គមេបញ្ជាការរងនៃកងយុទ្ធពលខេមរភូមិន្ទ លោក ហ៊ីង ប៊ុនហៀង។ ហើយ ក្នុងនោះ ក៏មានកូនប្រុសទាំងពីរ របស់លោក ហ៊ុន សែន គឺលោក ហ៊ុន ម៉ាណែត និង ហ៊ុន ម៉ានិត ផងនោះ ដែលពួកគេ ក៏មានភារកិច្ចចុះដឹកនាំបញ្ជា ដោះស្រាយ និងទប់ស្កាត់រាល់បញ្ហា ដែលកើតមានឡើងជាយថាហេតុ នៅគ្រប់ទិសដៅប្រារព្ធពិធីផ្សេងៗរបស់លោកនាយករដ្ឋមន្ត្រី និងភរិយា។
បើពិនិត្យទៅលើថ្ងៃ ដែលរដ្ឋាភិបាល សម្រេចបង្កើតក្រុមការងារនេះ គឺបានធ្វើឡើងចំពេល ដែលមានសេចក្តីស្នើកែច្បាប់បោះឆ្នោតចំនួន៤ ខណៈតុលាការកំពូល កំពុងពិនិត្យបណ្តឹងរំលាយអតីតគណបក្សសង្គ្រោះជាតិ។
វីអូឌី នៅមិនទាន់អាចសុំការអត្ថាធិប្បាយបន្ថែមណាមួយ ពីសមាជិកក្រុមការងារសន្តិសុខនោះនៅឡើយទេ។ ប៉ុន្តែ ជារឿយៗ គេសង្គេតឃើញមានការរឹតបន្តឹងសន្តិសុខយ៉ាងតឹងរឹងស្ទើគ្រប់ទីកន្លែង និងពេលវេលា ក្នុងរាជធានីភ្នំពេញ ជាពិសេសនៅក្នុងពេលមានពិធីថ្នាក់ជាតិម្តងៗ។
ចំពោះអ្នកស្រាវជ្រាវពីការអភិវឌ្ឍសង្គម លោក មាស នី មានប្រសាសន៍ថា ការរៀបចំក្រុមការងារសន្តិសុខ ខណៈស្ថានការនយោបាយកំពុងតានតឹងនេះ អាចបណ្តាលមកពីការបារម្ភពីសុវត្ថិភាពរបស់នាយករដ្ឋមន្ត្រី នៅពេលមានការរំលាយគណបក្សសង្គ្រោះជាតិ ដែលមានប្រជាពលរដ្ឋគាំទ្រជាងពាក់កណ្តាលប្រទេសនោះ៕
