មេដឹកនាំយោធាថៃលោក ប្រាយុទ្ធ ចាន់អូចា ថ្លែងនៅថ្ងៃអង្គារនេះ ដោយប្រកាសលុបចោលបំរាមដែលហាមបុគ្គលមួយចំនួនមិនឲ្យធ្វើនយោបាយនោះចេញ ដើម្បីឲ្យមានការចូលរួមប្រកួតប្រជែងការ បោះឆ្នោតដោយសេរីនៅខែវិច្ឆិកាឆ្នាំ២០១៨។
ជាច្រើនខែកន្លងទៅនេះគណបក្សធំៗជាច្រើនបានជំរុញឲ្យរដ្ឋាភិបាលយោធាលុបចោលការហាមឃាត់បុគ្គលមួយចំនួនមិនឲ្យធ្វើនយោបាយនោះ ហើយរៀបចំការបោះឆ្នោត។ ក្រោយការប្រកាសរបស់ លោក ប្រាយុទ្ធ ចាន់អូចា នេះមានការសាទរពីគណបក្សទាំងនោះ។
បើតាមការចុះផ្សាយរបស់សារព័ត៌មាន Straits Time បានឲ្យដឹងថា ការប្រកាសរៀបចំការបោះឆ្នោតដោយសេរីនេះ មានការស្វាគមន៍យ៉ាងខ្លាំងពីក្រុមអ្នកវិនិយោគ ខណៈបច្ចុប្បន្នថៃមានសេដ្ឋកិច្ចធំលំដាប់ទី២នៅអាស៊ីអាគ្នេយ៍បន្ទាប់ពីឥណ្ឌូនេស៊ី។
លោក ប្រាយុទ្ធ ចាន់អូចា ថ្លែងថា លោកនឹងប្រើប្រាស់មាត្រា៤៤នៃរដ្ឋធម្មនុញ្ញដើម្បីដោះស្រាយបញ្ហាវិបត្តិនយោបាយដែលកំពុងកើតមាន។
ក្រុមនយោបាយអាវក្រហមដែលកំពុងតែធ្វើសកម្មភាពប្រឆាំងរដ្ឋាភិបាលយោធាថៃ បានចេញសេចក្តីថ្លែងនៅថ្ងៃនេះថា នេះជា ជំហានល្អនៃការរៀបចំការបោះឆ្នោតតាមបែបប្រជាធិបតេយ្យ។ ទន្ទឹមនឹងការសាទរនេះ ក្រុមអាវក្រហមក៏ទាមទារឲ្យរដ្ឋាភិបាលយោធា លុបចោលបំរាមហាមការជួបជុំចេញ ដើម្បីឲ្យមហាជនអាចសម្តែងមតិបានវិញ។
ក្រុមយោធាចាប់ផ្តើមគ្រប់គ្រងរដ្ឋាភិបាលតាំងពីខែឧសភាឆ្នាំ២០១៤ នៅពេលដែលក្រុមនេះធ្វើរដ្ឋប្រហារបណ្តេញរដ្ឋាភិបាលស៊ីវិលរបស់លោកស្រី យីងឡាក់ ចេញពីតំណែង ហើយបានបញ្ចប់ភាពចលាចលនយោបាយ គឺបញ្ចប់ចលនាតវ៉ាតាមដងផ្លូវ ទាំងក្រុមប្រឆាំង និងក្រុមគាំទ្រ។
ក្រោយរដ្ឋប្រហារកាលពីឆ្នាំ២០១៤មក ទំនាក់ទំនងថៃ និងអឺរ៉ុបនៅលើផ្នែកជាច្រើនបានធ្លាក់ចុះ ប៉ុន្តែនៅដើមខែធ្នូនេះ អឺរ៉ុបបានបង្ហាញជំហរចាប់ផ្តើមជំនាក់ទំនងគ្រប់លំដាប់ថ្នាក់ជាមួយថៃវិញ។
កាលពីប៉ុន្មានខែមុនមេដឹកនាំថៃលោក ប្រាយុទ្ធ ចាន់អូចា ក៏បានសន្យានៅចំពោះមុនប្រធានាធិបតីអាមេរិក លោក ដូណាល ត្រាំ ថានឹងរៀបចំការបោះឆ្នោតនៅឆ្នាំ២០១៨ឲ្យបាន៕