ក្រសួងការបរទេសកូរ៉េខាងជើង បាននិយាយនៅថ្ងៃនេះថា ទណ្ឌកម្មថ្មីបំផុតរបស់អង្គការសហប្រជាជាតិប្រឆាំងនឹងក្រុងព្យុងយ៉ាង គឺជាសកម្មភាពបង្កសង្គ្រាម និងស្មើទៅនឹងការហ៊ុំព័ទ្ធសេដ្ឋកិច្ចទាំងស្រុងប្រឆាំងនឹងប្រទេសមួយនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃនេះ។
ក្រុមប្រឹក្សាសន្តិសុខអង្គការសហប្រជាជាតិ បានសម្រេចជាឯកច្ឆ័ន្ទដាក់ទណ្ឌកម្មថ្មីប្រឆាំងនឹងកូរ៉េខាងជើងកាលពីថ្ងៃសុក្រកន្លងមកនេះ ជាការឆ្លើយតបទៅនឹងការធ្វើតេស្តគ្រាប់មីស៊ីលអន្តរទ្វីបនាពេលថ្មីៗនេះរបស់របបក្រុងព្យុងយ៉ាង។ ក្រុមប្រឹក្សាមួយនេះ បានព្យាយាមដាក់កំហិតលើកូរ៉េខាងជើង ក្នុងការទិញផលិតផលប្រេងឥន្ទនៈចំរាញ់ និងប្រេងឆៅ ព្រមទាំងប្រភពចំណូលបានមកពីពលកររបស់ខ្លួនបម្រើការនៅឯបរទេស។
សេចក្ដីសម្រេចរបស់អង្គការសហប្រជាជាតិ បានព្យាយាមហាមឃាត់ការនាំចេញផលិតផលប្រេងសម្រេច ៩០ភាគរយ ចូលទៅកូរ៉េខាងជើងតាមរយៈការកំណត់ឲ្យនាំចូលត្រឹមតែ ៥សែនបារ៉ែលប៉ុណ្ណោះក្នុងមួយឆ្នាំ ហើយក៏បានទាមទារឲ្យបញ្ជូនជនជាតិកូរ៉េខាងជើងដែលកំពុងធ្វើការនៅបរទេស ឲ្យត្រឡប់ទៅប្រទេសវិញនៅក្នុងរយៈពេល ២៤ខែខាងមុខ។
សេចក្ដីសម្រេចដែលព្រាងឡើងដោយអាមេរិកនោះ ក៏បានដាក់កំហិតលើការនាំចូលប្រេងឆៅទៅកូរ៉េខាងជើង ឲ្យនៅត្រឹម ៤លានបារ៉ែលប៉ុណ្ណោះក្នុងមួយឆ្នាំ ហើយនឹងដាក់កំហិតបន្ថែមទៀត ប្រសិនបើកូរ៉េខាងជើងសាកល្បងនុយក្លេអ៊ែរ ឬគ្រាប់មីស៊ីលអន្តរទ្វីបជាថ្មីទៀត។
ក្នុងសេចក្ដីថ្លែងការណ៍មួយផ្សព្វផ្សាយដោយទីភ្នាក់ងារព័ត៌មានផ្លូវការកូរ៉េខាងជើង KCNA ក្រសួងការបរទេសកូរ៉េខាងជើង បាននិយាយថា អាមេរិកភ័យខ្លាចអំណាចនុយក្លេអ៊ែររបស់ខ្លួន ហើយកាន់តែឆ្កួតនឹងការដាក់ទណ្ឌកម្មធ្ងន់ធ្ងរបំផុតប្រឆាំងនឹងប្រទេសមួយនេះ។
ក្រសួងការបរទេសកូរ៉េខាងជើងនិយាយថា សេចក្ដីសម្រេចថ្មីនេះ មានន័យស្មើនឹងការរាំងខ្ទប់សេដ្ឋកិច្ចក្រុងព្យុងយ៉ាងទាំងស្រុង។ បើតាម Reuters ក្រុងព្យុងយ៉ាងបានគំរាមដាក់ពិន័យលើប្រទេសទាំងឡាយដែលគាំទ្រវិធានការប្រឆាំងនឹងខ្លួន៕