មនុស្សរាប់ម៉ឺននាក់ បានបង្ខំចិត្តភៀសខ្លួនចេញពីផ្ទះសម្បែងរបស់ពួកគេ បន្ទាប់ពីព្យុះត្រូពិកមួយ បានបោកបក់កាត់ភាគខាងត្បូងប្រទេសហ្វីលីពីន ដោយបណ្ដាលឲ្យមនុស្សយ៉ាងតិច ១៨២នាក់ស្លាប់។ នេះបើតាមសេចក្ដីរាយការណ៍របស់ AFP ដែលបានដកស្រង់ប្រភពពីប៉ូលិស និងទីភ្នាក់ងារគ្រប់គ្រងគ្រោះមហន្តរាយហ្វីលីពីននៅថ្ងៃនេះ។
ទីភ្នាក់ងារកាកបាទក្រហម និងអឌ្ឍចន្ទក្រហមអន្តរជាតិ បាននិយាយថា ព្យុះត្រូពិកតឹមប៊ីន ដែលបានបង្កជាទឹកជំនន់ដ៏ឆាប់រហ័ស និងការរអិលបាក់ដីផងនោះ បានបង្ខំមនុស្សជាង ៧ម៉ឺននាក់ ឲ្យចាកចេញពីផ្ទះសម្បែងរបស់ពួកគេ ខណៈព្យុះនេះបានវាយប្រហារកោះមិនដាណាវ ដែលជាកោះធំលំដាប់ទីពីររបស់ហ្វីលីពីន។
ហ្វីលីពីនប្រឈមមុខនឹងព្យុះធំៗជាមធ្យម ២០លើកក្នុងមួយឆ្នាំ ដោយភាគច្រើនសុទ្ធតែជាព្យុះប្រកបដោយគ្រោះថ្នាក់។ ប៉ុន្តែ កោះមិនដាណាវ ដែលមានមនុស្សរស់នៅប្រហែល ២០លាននាក់នោះ កម្ររងការវាយប្រហារពីព្យុះណាស់។
បើតាមប៉ូលិសហ្វីលីពីន មនុស្ស ១៥៣នាក់ទៀតកំពុងបាត់ខ្លួននៅឡើយ ហើយជាង ៤ម៉ឺននាក់ បានភៀសខ្លួនទៅកាន់ជំរុំសុវត្ថិភាព ខណៈដែលព្យុះតឹមប៊ីនវាយប្រហារចូលកោះមួយនេះកាលពីថ្ងៃសុក្រកន្លងមក។ អាជ្ញាធរហ្វីលីពីន កំពុងស្ថិតក្នុងប្រតិបត្តិការស្វែងរក និងជួយសង្គ្រោះ៕
