មហាសន្និបាតអង្គការសហប្រជាជាតិ នៅថ្ងៃនេះ បានជំរុញទៅភូមាឲ្យបញ្ចប់ប្រតិបត្តិការយោធាប្រឆាំងនឹងជនមូស្លីមរ៉ូហ៊ីងយ៉ា និងបានអំពាវនាវឲ្យមានការចាត់តាំងប្រេសិតពិសេសអង្គការសហប្រជាជាតិ បើទោះបីជាមានការជំទាស់ពីចិន រុស្ស៊ី និងបណ្ដាប្រទេសក្នុងតំបន់មួយចំនួនក៏ដោយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សេចក្ដីសម្រេចមួយដែលស្នើឡើងដោយអង្គការកិច្ចសហការឥស្លាម ត្រូវបានបោះឆ្នោតគាំទ្រពីសំណាក់ប្រទេសចំនួន ១២២ ដោយមានសំឡេងជំទាស់ ១០ប្រទេស ខណៈដែល ២៤ប្រទេសទៀត អនុប្បវាទ។
ប្រទេសចិន រុស្ស៊ី កម្ពុជា ឡាវ ហ្វីលីពីន វៀតណាម និងភូមាខ្លួនឯងផ្ទាល់ បានបោះឆ្នោតជំទាស់ទៅនឹងសេចក្ដីសម្រេចខាងលើ ដូចគ្នានឹងប្រទេសបេឡារុស ស៊ីរី និងហ្ស៊ីមបាវ៉េផងដែរ។
សេចក្ដីសម្រេចនោះ បានអំពាវនាវទៅរដ្ឋាភិបាលភូមា ឲ្យបើកផ្លូវដល់ក្រុមផ្ដល់ជំនួយ ធានាដល់ការធ្វើមាតុភូមិនិវត្តន៍នៃជនភៀសខ្លួនទាំងអស់ និងផ្ដល់សិទ្ធិជាពលរដ្ឋពេញលេញដល់ជនជាតិរ៉ូហ៊ីងយ៉ា។
សេចក្ដីសម្រេចក៏បានស្នើទៅអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទ័ររ៉េស ឲ្យតែងតាំងប្រេសិតពិសេសម្នាក់ប្រចាំនៅភូមាផងដែរ៕
