សម្ដេចប៉ាប ហ្វ្រង់ស៊ីស បានជំរុញទៅគ្រីស្ដសាសនិកទូទាំងពិភពលោក ១ពាន់ ៣០០លាននាក់ កុំឲ្យធ្វើព្រងើយកន្តើយចំពោះជនអន្តោប្រវេសន៍ ដែលត្រូវបានបណ្ដេញចេញពីប្រទេសរបស់ពួកគេ ដោយសារតែក្រុមមេដឹកនាំស្រេកឃ្លានជនស្លូតត្រង់។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន AFP។
សម្ដេចប៉ាបបានប្រាប់ក្រុមអ្នកទៅបួងសួងនៅវិហារបាស៊ីលីកាថា ដានជើងមនុស្សជាច្រើនទៀត ត្រូវបានកប់បាត់នៅក្នុងដានជើងរបស់ចូសេហ្វ និងម៉ារី។
សម្ដេចប៉ាបសញ្ជាតិអាហ្សង់ទីនរូបនេះថ្លែងថា៖ «យើងឃើញដានជើងមនុស្សរាប់លាននាក់ដែលមិនជ្រើសរើសដើរទៅណាឆ្ងាយទេ ប៉ុន្តែ ត្រូវបានបណ្ដេញចេញពីមាតុភូមិរបស់ពួកគេ ចាកចោលមនុស្សជាទីស្រឡាញ់របស់ពួកគេ»។
សម្ដេចប៉ាបព្រះជន្ម ៨១ឆ្នាំរូបនេះ ថ្លែងបន្តថា មនុស្សជាច្រើនដែលជាប់ផុងក្នុងវិបត្តិចំណាកស្រុកកំពុងកើតមាននោះ ត្រូវបានមេដឹកនាំរបស់ពួកគេបង្ខំឲ្យរត់ភៀសខ្លួន ដើម្បីរក្សាអំណាច និងបង្កើនទ្រព្យសម្បត្តិរបស់ពួកគេ ដោយមើលមិនឃើញបញ្ហានៅក្នុងឈាមជនស្លូតត្រង់នោះឡើយ។
សម្ដេចប៉ាបរូបនេះ បានអំពាវនាវបែបនេះ ចំពេលដែលមានវិបត្តិថ្មីកើតឡើងនៅតំបន់ West Bank បន្ទាប់ពីប្រធានាធិបតីអាមេរិក លោក ដូណាល់ ត្រាំ បានសម្រេចទទួលស្គាល់ទីក្រុងយេរូហ្សាឡឹម ជារដ្ឋធានីរបស់អ៊ីស្រាអែល។
សេចក្ដីសម្រេចបែបនេះរបស់លោក ត្រាំ កាលពីថ្ងៃទី០៦ ខែធ្នូនោះ បានជំរុញឲ្យមានបាតុកម្ម និងការប៉ះទង្គិចគ្នា ក្នុងនោះមានទាំងបាតុភាពកើតមាននៅទីក្រុង Bethlehme នៅក្នុងតំបន់ West Bank ស្ថិតក្រោមការកាន់កាប់របស់អ៊ីស្រាអែល ជាទីដែលគ្រីស្ដសាសនិកនឹងប្រារព្ធពិធីរំលឹកដល់កំណើតរបស់យេស៊ូ៕