អាជ្ញាធរវៀតណាមកំពុងតែរៀបចំជម្លៀសប្រជាជនជាង១លាននាក់ចេញពីតាំងភូមិសាស្ត្រទាបនៅតាមបណ្តោយឆ្នេរសមុទ្រភាគខាងត្បូង ដើម្បីបញ្ជៀសចេញពីគ្រោះថ្នាក់ ខណៈខ្យល់ព្យុះឈ្មោះ តឹមប៊ិន បានបោកបក់ទៅដល់ដែលអាចមានទាំងទឹកជំនន់និងបាក់ស្រុតដី។
ទន្ទឹមនឹងការប្រកាសជម្លៀសពលរដ្ឋនេះ អាជ្ញាធរវៀតណាមក៏បានប្រកាសឲ្យមានត្រៀមប្រុងប្រយ័ត្នខ្ពស់ដល់អណ្តូងជីកយកប្រេង និង ទូកនេសាទនៅក្នុងសមុទ្រជាង៦២ ០០០ ត្រូវរៀបចំត្រៀមការពារដើម្បីធានាពីសុវត្ថិភាព។ នេះបើតាមទីភ្នាក់ងារព័ត៌មានរ៉យទ័រ។
គណៈកម្មាធិការគ្រប់គ្រងគ្រោះមហន្តរាយវៀតណាមបានថ្លែងថា ពួកគេបានជួយមនុស្សជាង៧៤ ០០០នាក់ចេញពីតំបន់គ្រោះថ្នាក់ ហើយថាកំពុងតែរៀបចំជម្លៀសពលរដ្ឋជាង១លាននាក់នៅក្នុងខេត្តក្រុងចំនួន១៥ ទៅរកកន្លែងមានសុវត្ថិភាព។
នាយករដ្ឋមន្ត្រីវៀតណាម លោក ង្វ្រៀន សួនផុក បានបញ្ជាឲ្យបង្កើនការប្រុងប្រយ័ត្នសុវត្ថិភាពនៅកន្លែងជីកយកប្រេង ហើយថា បើហានិភ័យខ្លាំងអាចបិទអណ្តូងប្រេង ហើយជម្លៀសកម្មករចេញទៅរកកន្លែងមានសុវត្ថិភាព។
សាលារៀន និងក្រុមហ៊ុនជាច្រើននៅនៅក្នុងទីក្រុងហូជីមិញ ជាទីក្រុងនៅភាគខាងត្បូងត្រូវបានបិទទ្វារផ្អាកដំណើរការដោយសារតែឥទ្ធិពលនៃខ្យល់ព្យុះនេះ។
កាលពីថ្ងៃអាទិត្យខ្យល់ព្យុះតឹមប៊ិនបានវាយប្រហារខ្លាំងនៅលើកោះស្ព្រាតលី នៅក្នុងសមុទ្រចិនខាងត្បូង ជាទីកន្លែងដែលមានជម្លោះរវាងប្រទេសជាច្រើនពិសេសគឺរវាងចិន និងវៀតណាម។ ប៉ុន្តែមិនមានរបាយការណ៍នៃចំនួនអ្នកស្លាប់ ឬរងរបួសរបួសនៅទីនោះទេ។
ប្រទេសវៀតណាមមានស្ថានភាពដូចប្រទេសហ្វីលីពីន គឺប្រឈមខ្យល់ព្យុះរាល់ឆ្នាំ តែងតែបង្កគ្រោះថ្នាក់ដល់ជីវិតមនុស្សនិងខូចខាតទ្រព្យសម្បត្តិ។
ខ្យល់ព្យុះតឹមប៊ិន គឺជាព្យុះទី១៦ ដែលបានវាយប្រហារទៅលើប្រទេសវៀតណាមនៅក្នុងឆ្នាំនេះ ហើយបានបណ្តាលឲ្យមនុស្ស៣៩០នាក់បានស្លាប់ និងបាត់ខ្លួន៕
