ចិនបានរៀបចំការធ្វើពិពណ៌ពាណិជ្ជកម្មចិន-មីយ៉ាន់ម៉ា កាលពីថ្ងៃអង្គារម្សិលមិញ នៅក្នុងខេត្តយុនណាន (Yunnan) ស្ថិតនៅក្នុងភាគអាគ្នេយ៍នៃប្រទេសចិន ដែលធ្វើឡើងក្នុងបំណងពង្រីកការធ្វើពាណិជ្ជកម្មទ្វេរភាគីនៃប្រទេសទាំងពីរដែលមានព្រំដែនជាប់គ្នានេះ។
នេះគឺជាពិពណ៌រួមគ្នារវាងប្រទេសទាំងពីរដែលធ្វើឡើងលើកទី១៦ មានក្រុមហ៊ុនចំនួន២៨០ចូលរួមគឺក្រៅពីក្រុមហ៊ុនចិន និង មីយ៉ាន់ម៉ាក៏មានក្រុមហ៊ុនថៃ និងវៀតណាមដែរ។
ទីភ្នាក់ងារព័ត៌មានរដ្ឋចិនស៊ីនហួបានចុះផ្សាយថា នេះគឺជាសកម្មភាពធ្វើឡើងដើម្បីពង្រឹងឲ្យមានភាពកាន់តែប្រសើរឡើងនៃភាពជាដៃគូរបស់ប្រទេសទាំងពីរ។
របាយការណ៍របស់រដ្ឋាភិបាលចិនបង្ហាញថា ក្នុងឆ្នាំ២០១៦ ការដោះដូរទំនិញរវាងទីក្រុង Dezhou របស់ចិន និង មីយ៉ាន់ម៉ាមានទំហំទឹកប្រាក់ជិត៥ប៊ីលានដុល្លារ ដែលស្មើនឹង៤០,៥ភាគរយនៃការធ្វើពាណិជ្ជកម្មរវាងប្រទេសទាំងពីរនេះ។
តាមការចុះផ្សាយរបស់ The Diplomat ឲ្យដឹងថា ចិនមានឥទ្ទិពលលើប្រទេសមីយ៉ាន់ម៉ា បីទសវត្សរ៍ចុងក្រោយនេះគឺចិនជាប្រទេសធំបំផុតនៃដៃគូពាណិជ្ជកម្មដែលវិនិយោគផ្ទាល់ក្នុងប្រទេសមីយ៉ាន់ម៉ា។ ផលិតផលដែលមីយ៉ាន់ម៉ានាំទៅលក់នៅប្រទេសចិនមាន ផលិតផលកសិកម្ម សត្វចិញ្ចឹម និងធនធានរ៉ែ។ ចំណែកផលិតផលដែលចិននាំលក់ឲ្យមីយ៉ាន់ម៉ាវិញរួមមាន ម៉ាស៊ីន គ្រឿងអេឡិចត្រូនិច និងផលិតផលកែច្នៃហើយផ្សេងៗទៀត។
គិតចាប់ពីឆ្នាំ១៩៨៨មក ទឹកប្រាក់ជាង១៤ប៊ីលានដែលចិនវិនិយោគនៅក្នុងប្រទេសមីយ៉ាន់ម៉ាគឺស្មើនឹង១ភាគ៣នៃចំនួនវិនិយោគពីបណ្តាប្រទេសអាស៊ានវិនិយោគនៅក្នុងប្រទេសមីយ៉ាន់ម៉ា។ ទំហំនេះកាន់តែកើនឡើងថែមទៀតនៅពេលដែលដំណើរការភ្ជាប់បំពង់បង្ហូរឧស្ម័ននៃប្រទេសទាំងពីរ។
ស្ថានភាពនៃការវិនិយោគរបស់ក្រុមហ៊ុនចិនមិនបានធ្វើឲ្យពលរដ្ឋមីយ៉ាន់ម៉ាសប្បាយចិត្តជាមួយ ណាស់ណាទេ ដោយសារតែគម្រោងជាច្រើនពាក់ព័ន្ធការកាប់បំផ្លាញព្រៃឈើ ការជីកកាយយកធនធានធម្មជាតិ និង បានធ្វើឲ្យប៉ះពាល់ដោយផ្ទាល់ និង ដោយប្រយោលដល់ការរស់នៅរបស់ប្រជាពលរដ្ឋពិសេសពលរដ្ឋក្រីក្រ។
ដូរនយោបាយក្នុងប្រទេស
នៅក្នុងដំណាក់កាលប្រែប្រួលនយោបាយពីយោធា មកពាក់កណ្តាលយោធា ក្រោមការដឹកនាំរបស់លោក ថេន សេន ចាប់ពីឆ្នាំ២០១១ ដល់២០១៦គឺមានការប្រែប្រួលច្រើនទាំងសេដ្ឋកិច្ច និង នយោបាយ ដោយមេដឹកនាំរូបនេះ ព្យាយាមទំនាក់ទំនងជាមួយបណ្តាលប្រទេសលោកសេរី រួមទាំងសហរដ្ឋអាមេរិក និង បណ្តាប្រទេសនៅអឺរ៉ុប ពេលនោះទណ្ឌកម្មក៏មានការដកចេញជាបន្តបន្ទាប់ជំនួសមកវិញគឺជំនួយ និង ការវិនិយោគ។
រយៈពេលនៃការដឹកនាំរបស់លោក ថេន សេន ក្រៅពីការវិនិយោគរបស់ចិនក៏មានការវិនិយោគពីបណ្តាប្រទេសផ្សេងៗទៀតគឺ ការវិនិយោគពីជប៉ុន និង សិង្ហបុរីបានលេចមុខជាងគេ។
កាលពីខែមិថុនា ឆ្នាំ២០១៧ ទីភ្នាក់ងារវិនិយោគរបស់សិង្ហបុរីIE បានចុះអនុស្សរណៈនៃការយោគយល់គ្នាជាមួយមីយ៉ាន់ម៉ា ដែលកិច្ចព្រមព្រៀងនោះបានអនុញ្ញាតឲ្យសិង្ហបុរីអាចសិក្សានិង វិនិយោគលើគម្រោងរៀបចំលំនៅឋាននៅក្នុងទីក្រុង ផ្តត់ផ្គង់សម្ភារមធ្យោបាយដឹកជញ្ជូន ដំណើរការរោងចក្រផលិតទំនិញ សិក្សាលើប្រេង និង ឧស្ម័ន និង ជួយលើជំនាញនៃការផ្តល់សេវាផ្សេងៗទៀត។
ចំណុចទាំងនេះបង្ហាញពីភាពស្ទុះលឿននៃការទំនាក់ទំនងសេដ្ឋកិច្ចរវាងប្រទេសមីយ៉ាន់ម៉ា និង ប្រទេសសិង្ហបុរី។
ចំណែកការបោះទុនវិនិយោគរបស់ជប៉ុននៅក្នុងប្រទេសមីយ៉ាន់ម៉ាក៏កំពុងកើនឡើងខ្លាំងដែរ។ តំបន់សេដ្ឋកិច្ចពិសេសThilawa ជាការវិនិយោគរួមគ្នារវាងរដ្ឋាភិបាលមីយ៉ាន់ម៉ា និង ជប៉ុន។
ក្រុមហ៊ុនធំៗចំនួន៣របស់ជប៉ុនរួមមាន Marubeni, Sumitomo, និង Mitsubishi បានបោះទុនធំនៅតំបន់សេដ្ឋកិច្ចពិសេស Thilawa ហើយក្រុមហ៊ុនរបស់ជប៉ុនចំនួន២១ទៀតក៏បោះទុននៅក្នុងតំបន់សេដ្ឋកិច្ចពិសេសនេះដែរ ។ តំបន់សេដ្ឋកិច្ចពិសេស Thilawa មានទំហំ២៥០០ហិកតា ជាមជ្ឈមណ្ឌលពាណិជ្ជកម្មធំនៅអាស៊ី ដែលមានចម្ងាយ២៥គីឡូម៉ែត្រពីរដ្ឋធានីយ៉ង់ហ្គោន។
បញ្ហាវិបត្តិជនជាតិភាគតិចរ៉ូហ៊ីងយ៉ា
បញ្ហាវិបត្តិជនជាតិភាគតិចរ៉ូហ៊ីងយ៉ា ដែលផ្ទុះឡើងកាលពីខែសីហា កន្លងទៅបានធ្វើឲ្យប្រទេសនេះ ប្រឈមមុខជាថ្មីជាមួយប្រទេសលោកសេរី និង អង្គការអន្តរជាតិ។ ទន្ទឹមនឹងការថ្កោលទោសសហរដ្ឋអាមេរិកក៏បានផ្អាកជំនួយដល់យោធា និង កាត់បន្ថយការទំនាក់ទំនងមួយចំនួនដែរ។
ខណៈ មីយ៉ាន់ម៉ាកំពុងមានការប្រឈមមុខជាមួយប្រទេសលោកសេរី ដោយសារតែបញ្ហាវិបត្តិជនជាតិភាគតិចរ៉ូហ៊ីងយ៉ានោះ ចិនក៏បានបង្ហាញជំហរផ្តល់ភាពកក់ក្តៅដល់ប្រទេសមីយ៉ាន់ម៉ា។ កាលពីថ្ងៃទី២៣ខែវិច្ឆិកា លោក លី ហ្សួងចេង តំណាងឲ្យគណៈកម្មការកណ្តាលនៃយោធាចិនបានថ្លែងប្រាប់មេបញ្ជាការកងទ័ពរបស់មីយ៉ាន់ម៉ាលោក មីន អ៊ុងឡាំង ថា ចិនកំពុងតែរៀបចំធ្វើឲ្យការទំនាក់ទំនងលើវិស័យការពារបស់ចិន និងមីយ៉ាន់ម៉ាកាន់តែប្រសើរឡើង។
នៅក្នុងដំណាក់កាលនេះ អាចជាឱកាសថ្មីដែលចិនត្រូវចាប់ផ្តើមពង្រឹងឥទ្ធិពលរបស់ខ្លួនបន្ថែមទៀតទៅលើប្រទេសមីយ៉ាន់ម៉ា៕