រដ្ឋអំណាចចិននៅថ្ងៃពុធនេះ បានបង្ហាញពីការធ្វើសមយុទ្ធព័ទ្ធជុំវិញកោះតៃវ៉ាន់ដោយប្រើប្រាស់យន្តហោះចម្បាំង ស្របពេលដែលនាយករដ្ឋមន្ត្រីតៃវ៉ាន់ប្រកាសជាញឹកញាប់ថា ខ្លួនប្រើប្រាស់ច្បាប់ក្នុងគ្រប់គ្រងប្រទេសនិង រក្សាទំនាក់ទំនងល្អជាមួយប្រទេសចិន។
តាមប្រភពពីក្រសួងការពារជាតិតៃវ៉ាន់បានថ្លែងថា នេះជាទម្លាប់ទៅហើយដែលចិនតែងតែ ប្រើប្រាស់យន្តហោះចម្បាំងហោះចល័តជុំវិញកោះតៃវ៉ាន់ក្រោមរូបភាពធ្វើសមយុទ្ធ ប៉ុន្តែជាការគំរាមកំហែង។ នេះបើតាមទីភ្នាក់ងារព័ត៌មានរ៉យទ័រ។
ទីភ្នាក់ព័ត៌មានរដ្ឋចិនបានបង្ហាញរូបភាពនៃយន្តហោះចម្បាំងរបស់ចិន ហោះជុំវិញដែនដីកោះតៃវ៉ាន់។ សកម្មភាពនេះកើតមានឡើងប្រមាណ១០ដងកាលពីខែវិច្ឆិកា និង ដើមខែធ្នូ។
ចិននៅតែគិតថា ដែនដីប្រជាធិបតេយ្យតៃវ៉ាន់ គឺជាដែនដីដ៏ល្អ ហើយជាខេត្តមួយរបស់ចិនដែលបែងចែកដោយសារសង្គ្រាមនៅក្នុងស្រុករង់ចាំតែឱកាសល្អណាមួយមកដល់នឹងមានការបង្រួបបង្រួមជាតិឡើងវិញ ហើយអាចនឹងមានការប្រើប្រាស់កម្លាំងទ័ពក្នុងករណីចាំបាច់។
ការប្រឈមមុខដាក់គ្នារវាងរដ្ឋអំណាចទីក្រុងប៉េកាំង និង ដែនដីតៃវ៉ាន់កាន់តែប្រឈមមុខដាក់គ្នាខ្លាំងឡើង តាំងពីគណបក្សលោក ស្រី សៃ អ៊ឹងវេន ឈ្នះការបោះឆ្នោតហើយគ្រប់គ្រងអំណាចកាលពីឆ្នាំមុន និងមានការវាយប្រហារពាក្យសម្តីដាក់គ្នាជាបន្តបន្ទាប់រវាងថ្នាក់ដឹកនាំដែនដីទាំងពីរ។
ចិនតែងតែប្រកាសដាក់ដែនដីតៃវ៉ាន់ស្ថិតនៅក្នុងបន្ទាត់ក្រហមជាចំណុចអាចផ្ទុះសង្គ្រាមបើសិនជាមានការប្រកាសឯករាជ្យ។ ចំណែកលោកស្រី សៃ អ៊ឹងវេន មេដឹកនាំតៃវ៉ាន់ថ្លែងថា លោកស្រីចង់ឲ្យមានការទំនាក់ទំនងដោយសន្តិភាពជាមួយចិន ប៉ុន្តែថា លោកស្រីនឹងការពារជីវិតពលរដ្ឋនិង ដែនដីតៃវ៉ាន់មិនឲ្យមានការឈ្លានពានពីចិនទេ៕
