សហរដ្ឋអាមេរិកបានប្រកាសកាត់ផ្តាច់ថវិកាបរិច្ចាគដល់អង្គការសហប្រជាជាតិ ក្រោយពេលដែលអង្គសន្និបាតនៃស្ថាប័ននេះបានសម្រេចប្រឆាំងការចង់បានរបស់ប្រធានាធិបតីអាមេរិកលើបញ្ហាវិបត្តិនៅរដ្ឋធានីជេរូសាឡឹម។
រដ្ឋធានីវ៉ាស៊ីនបានប្រកាសថា បានជួយដល់ស្ថាប័នលំដាប់ពិភពលោកនេះឲ្យមានដំណើរការល្អ ហើយក៏ត្រូវតែគិតផលប្រយោជន៍របស់អាមេរិកជាធំ។ នេះបើតាមទីភ្នាក់ងារព័ត៌មាន Bernama។
មន្ត្រីរបស់អង្គការសហប្រជាជាតិថ្លែងប្រាប់ទីភ្នាក់ងារព័ត៌មាន Bernama ដោយមិនបង្ហាញឈ្មោះថា ពេលនេះស្ថានភាពហិរញ្ញវត្ថុសម្រាប់ដំណើរការអង្គការសហប្រជាជាតិកំពុងមានបញ្ហា ក្រោយពេលអាមេរិកប្រកាសកាត់ការជួយឧបត្ថម្ភ។
ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោក នីគិ ហាឡី បានប្រកាសពីការកាត់លុយបរិច្ចាគចំនួន២៨៥លានដុល្លារ ក្នុងចំណោមទឹកប្រាក់ចំនួន៥,៤ ប៊ីលានដុល្លារដុល្លារដែលអាមេរិកត្រៀមជួយដល់ដំណើរការអង្គការសហប្រជាជាតិពីឆ្នាំ២០១៨ដល់២០១៩។
តាមខ្លឹមសារនៃធម្មនុញ្ញអង្គការសហប្រជាជាតិ ដែលបានកំណត់ថា អាមេរិកជាបរិច្ចាគលុយច្រើនជាងគេគឺក្នុងនោះមានដល់២២%។ ក្នុងប្រតិបត្តិការកាលពីឆ្នាំមុនអាមេរិកបានបរិច្ចាគដល់១,២ប៊ីលានដុល្លារ ដែលស្មើនឹង២៨,៥%នៃចំនួនកញ្ចប់ថវិកាចំណាយសរុបរបស់អង្គការសហប្រជាជាតិនៅឆ្នាំ២០១៧និង២០១៨។
បញ្ហាឈានដល់ការកាត់ប្រាក់ឧត្ថម្ភនេះ ពាក់ព័ន្ធវិបត្តិនៅរដ្ឋធានីជេរ៉ូសាឡឹម។ កាលពីថ្ងៃទី៦ខែធ្នូប្រធានាធិបតីអាមេរិកបានប្រកាសទទួលស្គាល់ថា រដ្ឋធានីជេរ៉ូសាឡឹម ជារបស់អ៊ីស្រាអែល។
ការប្រកាសរបស់លោកត្រាំនេះ នាំមានប្រតិកម្មពីប្រទេសកាន់សាសនាឥស្លាមនានានៅលើពិភពលោក និង ការតវ៉ាកើតឡើងពីសំណាក់ពលរដ្ឋប៉ាឡេស្ទីន។
ក្រោយមកមានការកោះប្រជុំសមាជិកក្រុមប្រឹក្សាសន្តិសុខអង្គការសហប្រជាជាតិចំនួន១៥ប្រទេស ដែលក្នុងចំណោមមានទាំងអាមេរិកផងគឺ ១៤ប្រទេសផ្សេងទៀតបោះឆ្នោតឲ្យដកការសម្រេចរបស់លោកត្រាំ ឲ្យទុកករណីនេះឲ្យមានការដោះស្រាយតាមរយៈការចរចា រវាងភាគីពាក់ព័ន្ធ។
ក្រោយមកទៀតមានការកោះប្រជុំអង្គសន្និបាតនៃអង្គការសហប្រជាជាតិចំនួន១៩៣ប្រទេស ហើយសេចក្តីច្រើនលើសលប់គឺប្រឆាំងអាមេរិក។ ក្នុងនោះគឺ១២៨សំឡេងបោះឆ្នោតគាំទ្រឲ្យដកសេចក្តីសម្រេចរបស់អាមេរិកលើជម្លោះនៅជេរ៉ូសាឡឹម។
ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោក នីគិ ហាឡី បានព្រមានកត់ចំណាំប្រទេសឈ្មោះប្រទេសណាដែលបានបោះឆ្នោតប្រឆាំងអាមេរិក៕