របាយការណ៍សមត្ថកិច្ចឲ្យដឹងថា ភ្ញៀវទេសចរជាជនជាតិចិនម្នាក់បានស្លាប់ និង១២នាក់ផ្សេងទៀតរងរបួសធ្ងន់ ក្នុងករណីរថយន្តក្រឡាប់នៅក្នុងប្រទេសអ៊ីស្លង់កាលពីថ្ងៃពុធម្សិលមិញ។
នគរបាលអ៊ីស្លង់បានថ្លែងប្រាប់ទីភ្នាក់ងារព័ត៌មានAFPថា ក្នុងរថយន្តដឹកអ្នកដំណើរនោះមានអ្នកជិះចំនួន៤៤នាក់ ដែលក្នុងនោះគឺជនជាតិចិនទាំងអស់។
សម្រាប់អ្នកដែលរងរបួសធ្ងន់គឺសមត្ថកិច្ចប្រើប្រាស់ឧត្ថម្ភាចក្រ ដើម្បីជួយសង្គ្រោះដឹកចេញពីកន្លែងកើតហេតុទៅកាន់រដ្ឋធានី Reykjavik ដែលមានចម្ងាយប្រមាណ២៥០គីឡូម៉ែត្រពីកន្លែងកើតហេតុ។
ហេតុការណ៍គ្រោះថ្នាក់នេះកើតឡើងនៅកណ្តាលប្រទេស នៅក្នុងរដូវត្រជាក់ ដែលនៅលើផ្លូវពោរពេញទៅដោយទឹកកកនាំឲ្យមានការរអិលធ្លាក់រថយន្តចេញពីផ្លូវ៕
