មេដឹកនាំកូរ៉េខាងជើង លោក គីម ជុងអ៊ុន បានជំរុញទៅប្រទេសរបស់លោក ឲ្យផលិតក្បាលគ្រាប់នុយក្លេអ៊ែរ និងគ្រាប់មីស៊ីលកាន់តែធំ នៅក្នុងសារមួយនៅថ្ងៃចូលឆ្នាំថ្មីនាថ្ងៃនេះ។ នេះដោយផ្អែកតាមសេចក្ដីរាយការណ៍របស់ទីភ្នាក់ងារព័ត៌មាន AFP។
បើតាម AFP ការថ្លែងបែបនេះរបស់មេដឹកនាំកូរ៉េខាងជើងរូបនេះ បញ្ជាក់ថា លោកនឹងបន្តជំរុញកម្មវិធីផលិតអាវុធរបស់ប្រទេសនេះ ដែលបានបង្កឲ្យមានទណ្ឌកម្មពីអន្តរជាតិ។
ក្រុងព្យុងយ៉ាងបានប្រឹងប្រែងប្រែក្លាយខ្លួនទៅជាមហាអំណាចនុយក្លេអ៊ែរនៅឆ្នាំ២០១៧ បើទោះបីជាប្រឈមមុខនឹងទណ្ឌកម្មអន្តរជាតិ និងការគំរាមកំហែងពីអាមេរិកយ៉ាងណាក៏ដោយ។
ក្នុងសារប្រចាំរបស់លោក លោក គីម បានថ្លែងថា៖ «យើងត្រូវតែផលិតក្បាលគ្រាប់នុយក្លេអ៊ែរ និងគ្រាប់មីស៊ីលឆ្លងទ្វីប និងបង្កើនការដាក់ពង្រាយ»។ លោកបានបន្ថែមថា កូរ៉េខាងជើងបានសម្រេចគោលដៅរបស់ខ្លួន ក្លាយទៅជារដ្ឋនុយក្លេអ៊ែរ។
មេដឹកនាំកូរ៉េខាងជើងរូបនេះ បានត្រួតពិនិត្យមើលលើការធ្វើតេស្ដគ្រាប់មីស៊ីលជាច្រើនសារនៅឆ្នាំ២០១៧កន្លងទៅ និងការសាកល្បងគ្រាប់បែកនុយក្លេអ៊ែរលើកទី៦ និងខ្លាំងក្លាបំផុត ដែលក្រុងព្យុងយ៉ាងប្រកាសថា ជាគ្រាប់បែកអ៊ីដ្រូសែនកាលពីខែកញ្ញាកន្លងមក៕