ទីភ្នាក់ងារព័ត៌មាន Reuters បានរាយការណ៍ថា លោក គីម ជុងអ៊ុន បានព្រមានអាមេរិកនៅថ្ងៃនេះថា លោកមានប៊ូតុងនុយក្លេអ៊ែរនៅលើតុរបស់លោក សម្រាប់ប្រើប្រាស់ ប្រសិនបើកូរ៉េខាងជើងរងការគំរាមកំហែង ប៉ុន្តែ បើកផ្លូវសម្រាប់ជជែកជាមួយកូរ៉េខាងត្បូង ដោយលោកថា លោកបើកចំហរសម្រាប់ការពិភាក្សាជាមួយក្រុងសេអ៊ូល។
បន្ទាប់ពីគ្របដណ្ដប់ទៅដោយភាពតានតឹង និងការគំរាមកំហែងដាក់គ្នាយ៉ាងបែកផ្សែងជុំវិញកម្មវិធីនុយក្លេអ៊ែរកូរ៉េខាងជើង លោក គីម បានប្រើប្រាស់សារចូលឆ្នាំថ្មីរបស់លោក ដើម្បីអំពាវនាវឲ្យបន្ថយភាពតានតឹងផ្នែកយោធានៅលើឧបទ្វីបកូរ៉េ និងកែលម្អទំនាក់ទំនងជាមួយកូរ៉េខាងត្បូង។
លោក គីម ថ្លែងតាមទូរទស្សន៍ថា៖ «នៅពេលនិយាយដល់ទំនាក់ទំនងខាងជើង-ខាងត្បូង យើងគួរតែបន្ធូរបន្ថយភាពតានតឹងផ្នែកយោធានៅលើឧបទ្វីបកូរ៉េ ដើម្បីបង្កើតបរិយាកាសសន្តិភាព។ ប៉ុន្តែ ទាំងខាងជើង និងខាងត្បូង គួរតែប្រឹងប្រែង»។
លោក គីម បានថ្លែងថា លោកនឹងពិចារណាប្រតិភូទៅចូលរួមព្រឹត្តិការណ៍កីឡាអូឡាំពិករដូវរងារ ដែលនឹងរៀបចំធ្វើឡើងនៅទីក្រុងព្យុងឆាង នៅកូរ៉េខាងត្បូង នៅខែកុម្ភៈ។
ប្រធានាធិបតីកូរ៉េខាងត្បូង លោក មូន ជែអ៊ីន បាននិយាយថា ការចូលរួមរបស់កូរ៉េខាងជើង នឹងធានានូវសុត្ថិភាពរបស់កីឡាអូឡាំពិកនៅទីក្រុងព្យុងឆាង ហើយលោកស្នើកាលពីខែមុនថា ក្រុងសេអូល និងក្រុងវ៉ាស៊ីងតោន ពន្យាពេលនៃការធ្វើសមយុទ្ធទ្រង់ទ្រាយធំ ដែលសមយុទ្ធនោះ ត្រូវបានក្រុងព្យុងយ៉ាងថ្កោលទោស ចាត់ទុកជាទង្វើបង្កសង្គ្រាម៕
