រដ្ឋាភិបាលថ្មីរបស់នេប៉ាល់ នៅឆ្នាំ២០១៨ កំពុងតែប្រកាសថា ខ្លួនធ្វើយ៉ាងណារក្សាជំហរក្នុងការទំនាក់ទំនងការបរទេសជាមួយប្រទេសមហាយក្សពីរនៅអាស៊ីគឺប្រទេសចិន និង ប្រទេសឥណ្ឌា ប៉ុន្តែប្រទេសទាំងពីរសុទ្ធតែចង់ប្រើប្រាស់ឥទ្ធិពល និង ទាញផលប្រយោជន៍ពីប្រទេសនេប៉ាល់។
គោលនយោបាយបរទេសរបស់នេប៉ាល់ កន្លងមកមិនបានផ្តោតលើការរក្សាតុល្យភាពនៃអំណាចរវាងចិន និង ឥណ្ឌាទេ ខណៈនេប៉ាល់មានកិច្ចព្រមព្រៀងជាច្រើនក្នុងការទំនាក់ទំនងសេដ្ឋកិច្ចជាមួយប្រទេសទាំងពីរ។
ការប្រឈមមុខដាក់គ្នារវាងប្រទេសចិន និង ឥណ្ឌានៅតាមព្រំដែនក្នុងឆ្នាំ២០១៧ ត្រូវបានគេមើលឃើញថា នឹងក្លាយទៅជាសម្ពាធកាន់តែខ្លាំងលើប្រទេសនេប៉ាល់ជាប្រទេសតូចមួយដែលស្ថិតនៅចន្លោះកណ្តាលនៃបណ្តោយព្រំដែនប្រទេសមហាយក្សទាំងពីរ។
នេប៉ាល់គឺជាប្រទេសដែលមានផ្ទៃដី១៤៧ ១៨១ គីឡូម៉ែត្រការ៉េ មានប្រជាជនជាង២៨លាននាក់ ចំណែក ចិនមានផ្ទៃដីជាង៩លាន៥សែនគីឡូម៉ែត្រការ៉េ មានប្រជាជនជាង១,៣ ប៊ីលាននាក់ ឥណ្ឌា មានផ្ទៃដី ជាង៣ លានគីឡូម៉ែត្រការ៉េ មានប្រជាជនជាង១,៣ប៊ីលាននាក់។ បើប្រៀបធៀបគឺប្រទេសនេប៉ាល់ដូចជាកូនស្រម៉ោចមួយនៅចន្លោះកណ្តាលដំរីធំពីរ។
តាមការវិភាគរបស់ Global Time និងសារព័ត៌មានអន្តរជាតិផ្សេងៗទៀត លើកឡើងថា នៅឆ្នាំ២០១៨នេះ និង មានការប្រឈមមុខគ្នារវាងចិន និង ឥណ្ឌាបន្ថែមទៀត ហើយមានសម្ពាធកាន់តែខ្លាំងលើប្រទេសនេប៉ាល់។
ទោះជាយ៉ាងណា នេប៉ាល់នៅតែបញ្ជាក់ជំហរថា រក្សាគោលនយោបាយការបរទេសរបស់ខ្លួនឯករាជ្យមិនប្រកាន់ក្រុមណាមួយនោះទេ។ នេប៉ាល់ធ្លាប់ចុះហត្ថលេខាសន្តិភាព និងមិត្តភាពជាមួយឥណ្ឌាកាលពីឆ្នាំ១៩៥០ ហើយបានចុះហត្ថលេខាគោលនយោបាយ ផ្លូវមួយខ្សែក្រវ៉ាត់មួយរបស់ចិន ចំណែកចិនកំពុងតែបង្កើនការវិនិយោគនៅក្នុងប្រទេសនេប៉ាល់។
នេប៉ាល់ចង់ឈរជាប្រទេសមួយដែលស្មើមុខជាមួយចិន និង ឥណ្ឌាលើឆាកអន្តរជាតិក្នុងនាមជាប្រទេសមួយ ដែលមានឯករាជ្យ និង បូរណភាពទឹកដី៕