របាយការណ៍សមត្ថកិច្ចថៃបង្ហាញថា ចំនួនភ្ញៀវទេសចរប្រចាំឆ្នាំ២០១៧ បូករួមចំនួនសន្ទុះចុងក្រោយនៃចំនួនអ្នកដើរកំសាន្តបុណ្យឆ្លងឆ្នាំសកលមានចំនួនជាង៣៥លាននាក់ គឺលើសពីការរំពឹងទុករបស់រដ្ឋាភិបាលយោធានៃប្រទេសនេះ។
តាមរបាយការណ៍របស់អាជ្ញាធរទេសចរណ៍ថៃ ដែលដកស្រង់ចុះផ្សាយដោយសារព័ត៌មានបាកកកប៉ុស្តិ៍បានឲ្យដឹងថា ចំនួនភ្ញៀវទេសចរគិតត្រឹមថ្ងៃទី២៩ខែធ្នូ មានចំនួន៣៥លាននាក់ ហើយថា ក្នុងថ្ងៃបុណ្យឆ្លងឆ្នាំនេះ និងមានចំនួនកើនឡើងមួយកម្រិតទៀត។
កាលពីដើមឆ្នាំ២០១៧ អាជ្ញាធរថៃបានបង្ហាញគម្រោងថា នឹងទាក់ទាញភ្ញៀវទេសចរឲ្យបាន៣៥លាននាក់ ខណៈកាលពីឆ្នាំ២០១៦ថៃទទួលបានភ្ញៀវទេសចរណ៍ជាង៣២លាននាក់។ ប៉ុន្តែក្រោយមករដ្ឋាភិបាលបង្ហាញក្តីរំពឹងថយចុះជាងនេះ ដោយយោងហេតុការណ៍មួយចំនួន។
ថៃគឺជាប្រទេសដែលមានប្រជាពលរដ្ឋជិត៧០លាននាក់ បើយោងតាមរបាយការណ៍របស់អង្គការធនាគារពិភពលោក ហើយប្រទេសនេះមានភូមិសាស្ត្រជាច្រើនដែលកំពុងទាក់ទាញភ្ញៀវទេសចរ ដែលបច្ចុប្បន្នចិនគឺជាភ្ញៀវទេសចរណ៍ច្រើនជាងគេរបស់ថៃ៕
