រដ្ឋាភិបាលកម្ពុជាប្រកាសចាក់បញ្ចាំងខ្សែភាពយន្តឯកសារតាមទូរទស្សន៍ ស្តីពីដំណើររំដោះកម្ពុជាពីរបបខ្មែរក្រហម ខណៈអ្នកវិភាគយល់ថាគណបក្សប្រជាជនកំពុងលើកតម្កើងប្រជាប្រិយភាពខ្លួនឡើងវិញតាមរយៈថ្ងៃ៧មករា។
ក្នុងសេចក្តីជូនដំណឹងកាលពីថ្ងៃទី២ មករាម្សិលមិញ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រីបានឲ្យដឹងថាថ្ងៃទី៣ មករានេះវេលាម៉ោង ៧ ល្ងាច ស្ថានីយ៍ទូរទស្សន៍ឯកជនមួយចំនួននឹងធ្វើការផ្សាយបន្តផ្ទាល់ពីស្ថានីយ៍ទូរទស្សន៍ជាតិកម្ពុជា នូវភាពយន្តឯកសារប្រវត្តិសាស្ត្រ ដែលត្រូវបានដាក់ចំណងជើងថា « ដំណើរឆ្ពោះទៅរកការសង្គ្រោះជាតិ »។
ក្នុងវីដេអូ ភាពយន្តឯកសាររយៈពេល១ម៉ោង ៣៤នាទីនោះ បានបង្ហាញផ្នែកខ្លះរបស់លោកនាយករដ្ឋមន្ត្រី ហ៊ុន សែន ដែលបានបរិយាយពីការភៀសខ្លួនរបស់លោកទៅសុំជំនួយពីប្រទេសវៀតណាម ដែលក្នុងនោះលោកលើកឡើងថាលោកប្រហែលជ្រើសរើសមធ្យោបាយសម្លាប់ខ្លួនប្រសិនជាវៀតណាមបញ្ជូនលោកត្រលប់មកកម្ពុជាវិញ។
លោកថា៖ « គឺធ្វើអត្ថឃាតខ្លួនឯងតាមគ្រប់មធ្យោបាយទាំងអស់។ ប៉ុន្តែជម្រើសនេះខ្ញុំទុកប្រើនៅឯវៀតណាមទៅវិញទេ តាមរយៈមច្ចុល១២ដើមនៅក្នុងហ៊ោប៉ៅដែលត្រៀមបុកចូលបំពង់កក្នុងករណីដែលវៀតណាមចាប់បញ្ជូនត្រលប់មកវិញ » ។
អ្នកនាំពាក្យនៃអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី លោក ទិត សុធា មិនបានបញ្ជាក់ពីគោលបំណងនៃចាក់ផ្សាយនេះទេ ដោយឲ្យអ្នកសារព័ត៌មានរង់ចាំមើលភាពយន្តឯកសារនោះដោយខ្លួនឯង។
លោកថា៖ « លោកចាំតាមដានមើលម៉ោង៧ យប់ហ្នឹងសិនចុះ » ។
អ្នកវិភាគបញ្ហាសង្គមលោកបណ្ឌិត មាស នី យល់ថាការចាក់ផ្សាយភាពយន្តឯកសារនៅពេលនេះគឺជាផ្នែកមួយនៃយុទ្ធនាការនយោបាយរបស់បក្សប្រជាជនក្នុងការទាក់ទាញប្រជាប្រិយភាព និងលើកឡើងពីគុណសម្បត្តិរបស់ខ្លួននៅពេលដែលយុទ្ធនាការឃោសនាបោះឆ្នោតកាន់តែខិតជិតមកដល់ និងអាចបង្ហាញពីការដឹងគុណពីការជួយរបស់វៀតណាមផងដែរ។
លោកថា៖ « តែសម្រាប់ជាទស្សនៈខ្ញុំវិញ កាលមុនដូចជាមន្ត្រីជាន់ខ្ពស់របស់គណបក្សប្រជាជនគាត់ធ្លាប់និយាយដែលថា យើងកុំនៅស៊ីកេរ្ត៍៧មករាហ្នឹងយូរពេកសំខាន់គឺគិតពីរឿងបច្ចប្បន្ននេះ។ ហើយរឿងដែលមានភាពចម្រូងចម្រាស់នៅក្នុងខ្សែភ្នែកនៃកូនខ្មែរដដែលទេព្រោះមាននៅមានការចោទប្រកាន់គ្នាថាថ្ងៃ៧ មករាជាថ្ងៃដែលមានការលុកលុយពីវៀតណាមចូលមកខ្មែរនោះ វាមានការយល់ឃើញខុសគ្នាចឹង » ។
ទោះជាយ៉ាងណាលោកមាស នី យល់ថា ខ្សែភាពយន្តនេះនៅមិនទាន់អាចបង្ហាញពីការពិតទាំងស្រុងនៃប្រវត្តិសាស្ត្រសង្គ្រាមរវាងកម្ពុជាវៀតណាមនៅឆ្នាំ១៩៧៩នោះនៅឡើយទេ ខណៈប្រវត្តិសាស្ត្រនៃរឿងនេះនៅតែមានភាពចម្រូងចម្រាស់នៅឡើយ៕