របាយការណ៍ស្រាវជ្រាវរបស់Bloomberg បង្ហាញថា អត្រាកំណើនសេដ្ឋកិច្ចរបស់ថៃនៅឆ្នាំ២០១៧កន្លងទៅនេះ មានការរីក ប៉ុន្តែថា នៅឆ្នាំ២០១៨ និង ២០១៩ ខាងមុខនឹងមានការធ្លាក់ចុះទៅវិញជួបប្រទះស្ថានភាពលំបាកមួយចំនួន។
តាមរបាយការណ៍សិក្សាបង្ហាញថា អត្រាកំណើនសេដ្ឋកិច្ចនៅឆ្នាំ២០១៧មាន៣,៨% ហើយថា អត្រាកំណើននេះកើនឡើងខ្លាំងបើប្រៀបធៀប អត្រាកំណើនកាលពីឆ្នាំ២០១២។ ប៉ុន្តែការសិក្សាបញ្ជាក់ថា អត្រាកំណើនសេដ្ឋកិច្ចនេះនឹងធ្លាក់ចុះគឺស្ថិតនៅក្នុងកម្រិត៣,៧% នៅឆ្នាំ២០១៨ និង ធ្លាក់មកកម្រិត៣,៦% នៅឆ្នាំ២០១៩។ អត្រាកំណើនសេដ្ឋកិច្ចថៃធ្លាក់ចុះទាបជាងវៀតណាមនិង ហ្វីលីពីន។
ទោះយ៉ាងណារបាយការណ៍សិក្សាបង្ហាញថា ឆ្នាំ២០១៧ និង ២០១៨ អត្រាកំណើនសេដ្ឋកិច្ចនៅតែស្ថិតនៅក្នុងស្ថានភាពល្អប្រសើរបើប្រៀបធៀបទៅនឹងការវិត្តសេដ្ឋកិច្ចប្រមាណ៥ឆ្នាំចុងក្រោយនេះ។
នៅទសវត្សរ៍ចុងក្រោយនេះ អត្រាកំណើនសេដ្ឋកិច្ចរបស់ថៃមានការធ្លាក់ចុះគឺស្ថិតនៅក្នុងរង្វង់៣% បើប្រៀបធៀបនិង រយៈពេលប្រមាណ១០ឆ្នាំមុន គឺអត្រាកំណើនសេដ្ឋកិច្ចរបស់ថៃស្ថិតនៅក្នុងរង្វង់៤,៦%។
ការសិក្សារបស់ Bloomberg រកឃើញថា រដ្ឋាភិបាលយោធាដែលដឹកនាំដោយលោកប្រា យុទ្ធ ចាន់អូចា បានបង្កើនការចំណាយដល់ ៤៦ប៊ីលានដុល្លារ ក្នុងការពង្រីកហេដ្ឋារចនាសម្ព័ន្ធដូចជា ផ្លូវរថភ្លើងល្បឿនសហការជាមួយចិន និង បង្កើនបណ្តាញផ្លូវសំខាន់ក្នុងទីក្រុងបាងកក។
តាមគម្រោងរបស់រដ្ឋាភិបាលថៃគឺការបង្កើនការនាំទំនិញចេញ និង ពង្រីកវិស័យទេសចរណ៍ នឹងធ្វើឲ្យអត្រាកំណើនសេដ្ឋកិច្ចជាតិអាចរីកចម្រើនដល់៤,៦%នៅឆ្នាំនេះ។
អ្នកជំនាញនៅ Bloomberg លើកឡើងដែរថា ការបោះឆ្នោតនៅខែវិច្ឆិកាចុងឆ្នាំនេះ នឹងក្លាយជាចំណុចចម្បងដែលនាំឲ្យមានបញ្ហារាំងស្ទះដល់សេដ្ឋកិច្ច ដែលបារម្ភពីបញ្ហាជម្លោះនានាកើតឡើង។
ប៉ុន្តែបើតាមការចុះផ្សាយរបស់សារព័ត៌មាន Straits Time មានការសន្និដ្ឋានផ្ទុយពីនេះ គឺបានបញ្ជាក់ថា ការប្រកាសរៀបចំការបោះឆ្នោតដោយសេរី តាមការអះអាងរបស់មេដឹកនាំយោធានេះ មានការស្វាគមន៍យ៉ាងខ្លាំងពីក្រុមអ្នកវិនិយោគ ខណៈបច្ចុប្បន្នថៃមានសេដ្ឋកិច្ចធំលំដាប់ទី២នៅអាស៊ីអាគ្នេយ៍បន្ទាប់ពីឥណ្ឌូនេស៊ី។
តាមរបាយការណ៍ចុះផ្សាយរបស់គេហទំព័រ World’s Top Exports បានឲ្យដឹងថា ប្រទេសដៃគូពាណិជ្ជកម្មសំខាន់ជាគេរបស់ថៃគឺ សហរដ្ឋអាមេរិក ហើយបន្តបន្ទាប់ទៀត រួមមាន ចិន ជប៉ុន ហុងកុង អូស្រ្តាលី ម៉ាឡេស៊ី វៀតណាម សិង្ហបុរី និង ឥណ្ឌូនេស៊ីជាដើម។
នៅពេលប្រទេសនេះ មានស្ថិរភាពនយោបាយ ដើរតាមគន្លងប្រជាធិបតេយ្យ និង ការគោរពសិទ្ធិមនុស្ស គេមើលឃើញថា កម្លាំងសេដ្ឋកិច្ចកាន់តែស្ទុះឡើងថែមទៀត ព្រោះមានការងាកមកសហការជាថ្មី ពីប្រទេសសមាជិកសហភាពអឺរ៉ុប និង សហរដ្ឋអាមេរិក។
ថៃបច្ចុប្បន្នកំពុងតែមានការរីកចម្រើន នៅក្នុងតំបន់ ហើយបើយោងតាមរបាយការណ៍អង្គការទេសន្ដរប្រវេសន៍អន្ដរជាតិ (IOM) បានឲ្យដឹងថា ពលរដ្ឋនៅក្នុងប្រទេសជិតខាងចំនួនជាង៣លាននាក់បានចូលទៅរកការងារធ្វើនៅក្នុងប្រទេសថៃ ខណៈអង្គការនៅក្នុងតំបន់មួយចំនួនថា ពលករពីប្រទេសផ្សេងៗទៅរកការងារធ្វើនៅក្នុងប្រទេសថៃទាំងស្រប និង ខុសច្បាប់មានជាង ៤លាននាក់ ឬ ច្រើនជាងនេះ៕
