ព្យុះស៊ីក្លួនបោកបក់និងបាននាំទាំងខ្យល់ត្រជាក់នៅឆ្នេរសមុទ្រភាគខាងកើតនៃសហរដ្ឋអាមេរិកនៅថ្ងៃព្រហស្បតិ៍ម្សិលមិញ ដែលមានទាំងព្រិលនិងអាកាសធាតុត្រជាក់ខ្លាំង បានបណ្តាលឲ្យមនុស្សចំនួន៤នាក់បានស្លាប់ ហើយអ្នកធ្វើដំណើរជួបស្ថានភាពលំបាក។
ខណៈដែលមនុស្ស៤នាក់ស្លាប់ដោយសារឥទ្ធិពលនៃខ្យល់ និង អាកាសធាតុត្រជាក់នេះ ផ្លូវធ្វើដំណើរជាច្រើនត្រូវបានរាយការណ៍ថា ពិបាកក្នុងការធ្វើដំណើរដោយសារតែកម្រិតនៃទឹកកក្រាស់។ នេះបើតាមទីភ្នាក់ងារព័ត៌មាន AFP។
ដោយសារតែបញ្ហាអាកាសធាតុនេះ ជើងហោះហើររាប់ពាន់បានលុបចោលវិញ សាលារៀនជាច្រើនកន្លែងត្រូវបានបិទទ្វារផ្អាកដំណើរការ។ សីតុណ្ហភាពនៅក្នុងទីក្រុង New York បានធ្លាក់ចុះក្នុងកម្រិតទាបបំផុត ខណៈតំបន់មួយចំនួនទៀតសីតុណ្ហភាពធ្លាក់ក្រោម០អង្សា។
ព្យុះដែលនាំមកនូវឥទ្ធិពលខ្យល់ត្រជាក់នេះ មន្ត្រីជំនាញអះអាងថា អាចអូសបន្លាយរហូតដល់ចុងសប្តាហ៍ក្រោយ ហើយនឹងរំកិលទៅភាគខាងជើង ចូលទៅក្នុងប្រទេសកាណាដា។
ដោយសារអាកាសធាតុត្រជាក់ និង តម្រូវការកើនឡើងនោះ ពលរដ្ឋអាមេរិករស់នៅតាមបណ្តោយឆ្នេរសមុទ្រប្រឈមនិងការខ្វះអគ្គិសនីប្រើប្រាស់គឺនៅ វីហ្គីនៀខ្វះ២៤០០០នាក់ នៅម៉ាស្យាជូសេតខ្វះ ៩០០០នាក់ និង រាប់ពាន់នាក់ផ្សេងទៀតខ្វះដែរនៅចចចៀ ការ៉ូលីណាខាងត្បូង និងហ្វ័រីដា៕