ក្រុមមន្ត្រីជាន់ខ្ពស់របស់កូរ៉េខាងត្បូងមួយក្រុមធ្វើដំណើរពីទីក្រុងសេអ៊ូលនៅថ្ងៃអង្គារនេះ ឆ្ពោះទៅកាន់តំបន់ផានមុនជុំ ជាទីតាំងជួបពិភាក្សាជាមួយមន្ត្រីជាន់ខ្ពស់របស់កូរ៉េខាងជើង។
កាលពីចុងឆ្នាំ២០១៥ កូរ៉េខាងជើងបានប្រកាសផ្តាច់ទំនាក់ទំនង ឬឈប់ជជែកគ្នាជាមួយកូរ៉េខាងត្បូងក្រោយមានភាពចម្រូងចម្រាស់កើតឡើងជាច្រើនដែលមូលហេតុសំខាន់ គឺកម្មវិធីអាវុធនុយក្លេអ៊ែរបស់កូរ៉េខាងជើង។ ចំណែកការចាប់ផ្តើមជជែកគ្នាឡើងវិញនៅពេលនេះគឺកើតឡើងក្រោយពីប៉ុន្មានខែចុងក្រោយភាពតានតឹងហាក់ឡើងដល់កម្រិតខ្ពស់ជាថ្មីទៀត។
បើតាមទីភ្នាក់ងារព័ត៌មាន AFP គឺមន្ត្រីកូរ៉េខាងត្បូងបានប្តេជ្ញាថា នឹងខិតខំធ្វើយ៉ាងណាចរចាឲ្យបានផលល្អ ហើយឲ្យមន្ត្រីនៃប្រទេសទាំងពីរមានការជជែកគ្នាកាន់តែប្រសើរលើបញ្ហាផ្សេងៗ។
សភាពការណ៍នយោបាយហាក់ធូរស្រាល ហើយឈានដល់មន្ត្រីប្រទេសទាំងពីរបានជជែកគ្នានេះ កើតឡើងបន្ទាប់ពីមេដឹកនាំកូរ៉េខាងជើង លោក គីម ជុងអ៊ុន ថ្លែងក្នុងឱកាសចូលឆ្នាំសកលថា លោកនឹងបញ្ជូនក្រុមការងារពីកូរ៉េខាងជើងទៅចូលរួមប្រកួតកីឡាអូឡាំពិករដូវត្រជាក់ដែលមានទីតាំងនៅកូរ៉េខាងត្បូង។
នៅថ្ងៃអង្គារនេះ មន្ត្រីរបស់កូរ៉េខាងត្បូងចំនួន៥នាក់ បានធ្វើដំណើរឆ្ពោះទៅកាន់ភូមិ ផានមុនជុំ ជាទីតាំងស្ថិតនៅព្រំដែននៃប្រទេសទាំងពីរ ហើយបច្ចុប្បន្នកូរ៉េខាងជើងកំពុងគ្រប់គ្រង។ តំបន់នេះ ជាទីកន្លែងដែលកូរ៉េទាំងពីរបានចុះហត្ថលេខាបញ្ឈប់ការបាញ់គ្នាកាលពីឆ្នាំ១៩៥៣ បន្ទាប់ពីរបងប្អូនទាំងពីរផ្ទុះសង្គ្រាមអស់៣ឆ្នាំ៕