ភ្លៀងធ្លាក់ខ្លាំងនៅសិង្ហបុរីនៅថ្ងៃចន្ទម្សិលមិញ ហើយបានបង្កឲ្យមានទឹកជំនន់ជាច្រើនកន្លែងនៅក្នុងប្រទេសមួយនេះ ប៉ុន្តែមិនទាន់មានរបាយការណ៍ គ្រោះថ្នាក់ឬខូចខាតទ្រព្យសម្បត្តិនោះទេ។
ភ្លៀងចាប់ផ្តើមធ្លាក់កាលពីម៉ោងប្រមាណ៩ព្រឹកម្សិលមិញ ហើយមន្ត្រីគ្រប់គ្រងធនធានទឹកថ្នាក់ជាតិបានចេញសារព្រមានថា នឹងមានទឹកជំនន់នៅតំបន់ផ្សេងៗដូចជា នៅចាឡាន់នីផា នៅជុនសិន និងផ្លូវលេខ៨ជាដើម។នេះបើតាមសារព័ត៌មាន Channel News Asia។
រូបភាពរបស់ Channel News Asia ជាច្រើនបានបង្ហាញពីទិដ្ឋភាពនៃទឹកលិច គឺបង្ហាញពីរថភ្លើងបើកលើផ្លូវដែកខាងលើ ហើយរថយន្តបើកផ្លូវលិចទឹកកាត់ពីក្រោម រូបអ្នកខ្លះរុញរថយន្ត អ្នកខ្លះឈរជិតរថយន្តដែលទឹកលិចស្ទើរដល់ចង្កេះ ហើយរថយន្តក្រុងបើកបរកាត់ទឹកជាដើម។
សិង្ហបុរីគឺជាប្រទេសតូចមួយមានផ្ទៃក្រឡាជាង៧០០គីឡូម៉ែត្រការ៉េស្ថិតនៅលើដែនកោះ នៅក្នុងតំបន់អាស៊ាន ហើយប្រទេសនេះកម្រជួបស្ថានភាពទឹកជំនន់ណាស់៕