លោកនាយករដ្ឋមន្រ្តី ហ៊ុន សែន បានលើកឡើងថា លោកបានដឹកនាំប្រទេសកម្ពុជាអស់រយៈពេល ៣៣ឆ្នាំកន្លងមកនេះ មិនមែនធ្វើឡើងតាមរយៈការប្រើអាវុធ ឬអំណាចផ្ដាច់ការដូចរបបមុនៗនោះឡើយ។
លោក ហ៊ុន សែន បានអះអាងបែបនេះ នៅក្នុងពិធីសំណេះសំណាលជាមួយក្រុមកម្មករជាង ៤ពាន់នាក់ មកពីតាមបណ្ដាញសេដ្ឋកិច្ចក្រៅប្រព័ន្ធនានា នៅរាជធានីភ្នំពេញ នៅព្រឹកថ្ងៃនេះ ចំថ្ងៃខួប ៣៣ឆ្នាំនៃការឡើងកាន់តំណែងជានាយករដ្ឋមន្ត្រីរបស់លោក។
លោក ហ៊ុន សែន ថ្លែងថា៖«រយៈពេល ៣៣ឆ្នាំ មិនមែនរស់ដោយសារចុងកាណុង ហើយក៏មិនមែនរស់ដោយអំពើផ្ដាច់ការដែរ។ ផ្ដាច់ការពិតប្រាកដ គឺប៉ុល ពត ប៉ុន្ដែ ប៉ុល ពត ក៏រស់បានត្រឹមតែរយៈពេល ៣ឆ្នាំ ៨ខែ ២០ថ្ងៃ។ លន់ នល់ ក៏ផ្ដាច់ការដោយមានការគាំទ្ររបស់កងទ័ពអាមេរិកទៀតផង ប៉ុន្ដែ គេរស់ត្រឹម ៥ឆ្នាំ។ សម្រាប់ខ្ញុំ ឆ្លងកាត់នូវពេលវេលាដ៏លំបាក ដែលចាប់ផ្ដើមពីការយកជីវិតធ្វើដើមទុន»។
ជាមួយគ្នានោះដែរ លោក ហ៊ុន សែន បានលើកឡើងដែរថា លោកមិនចង់ធ្វើជានាយករដ្ឋមន្រ្តីទេ ប៉ុន្តែ ដោយសារបញ្ហាប្រទេសជាតិច្រើន ដែលទាមទារឲ្យលោកដោះស្រាយ ទើបធ្វើឲ្យលោករកពេលសម្រាកពីតំណែងមិនទាន់បាន។
លោក ហ៊ុន សែន បានអះអាងបែបនេះ ចំថ្ងៃដែលលោកបានឡើងកាន់តំណែងជានាយករដ្ឋមន្ត្រីកម្ពុជាកាលពី ៣៣ឆ្នាំមុន។
ប៉ុន្តែ អង្គការលើកលែងទោសអន្តរជាតិ បានលើកឡើងនៅក្នុងរបាយការណ៍របស់ខ្លួនកាលពីចុងខែឧសភាឆ្នាំមុនថា លោក ហ៊ុន សែន បាន និងកំពុងប្រើប្រាស់ប្រព័ន្ធយុត្តិធម៌កម្ចាត់ក្រុមអ្នករិះគន់លោក។
អង្គការឃ្លាំមើលសិទ្ធិមនុស្ស Human Rights Watch បាននិយាយក្នុងរបាយការណ៍របស់ខ្លួនកាលពីខែមករាឆ្នាំ២០១៥ថា នៅអំឡុងពេលកាន់អំណាចរយៈពេលជាង ៣ទសវត្សរ៍មកនេះ លោក ហ៊ុន សែន បានប្រើប្រាស់ម្ដងហើយម្ដងទៀតនូវអំពើហិង្សានយោបាយ ការបង្ក្រាប និងអំពើពុករលួយ ដើម្បីរក្សាអំណាច៕
