ទីភ្នាក់ងារព័ត៌មាន AFP បានចុះផ្សាយថា នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ បានស្វែងរកការដាក់សម្ពាធពីសំណាក់សហគមន៍អឺរ៉ុប ទៅលើកូរ៉េខាងជើងកាលពីថ្ងៃម្សិលមិញនេះ នៅឯទីក្រុងសូហ្វ៊ីយ៉ា ខណៈលោកប្ដេជ្ញាជំរុញកិច្ចសហប្រតិបត្តិការផ្នែកសេដ្ឋកិច្ចជាមួយប្រទេសប៊ុលហ្ការី និងតំបន់បាល់កង់។
AFP បានដកស្រង់សម្ដីលោក អាបេ ដែលបានថ្លែងថា លោកបានជជែកអំពីស្ថានភាពសន្តិសុខកាន់តែអាក្រក់នៅតំបន់អាស៊ីខាងកើត ហើយលោកបានលើកឡើងពីសារៈសំខាន់នៃការកាត់ផ្ដាច់កិច្ចការសហប្រតិបត្តិការរបស់ប្រទេសប៊ុលហ្ការីជាមួយបញ្ហាកូរ៉េខាងជើង។
លោក អាបេ បានជួបពិភាក្សាជាមួយនាយករដ្ឋមន្ត្រីប៊ុលហ្ការី លោក Boyko Borisov ខណៈដែលប្រទេសមួយនេះ នឹងត្រូវឡើងកាន់តំណែងជាប្រធានប្ដូរវេននៃសហភាពអឺរ៉ុប នៅក្នុងរយៈពេល ៦ខែខាងមុខទៀតនេះ។
ទីភ្នាក់ងារព័ត៌មាន AFP បានដកស្រង់សម្ដីនាយករដ្ឋមន្ត្រីប៊ុលហ្ការី លោក Borisov ដែលបាននិយាយថា ប្រទេសលោកថ្កោលទោសចំពោះឥរិយាបថរបស់កូរ៉េខាងជើង ដែលបានបាញ់គ្រាប់មីស៊ីល និងបញ្ហាកម្មវិធីនុយក្លេអ៊ែរ ដោយលោកថា បញ្ហាទាំងអស់ ត្រូវតែដោះស្រាយដោយសន្តិវិធី តាមរយៈការចរចា៕