នាវាកម្សាន្តល្បឿនលឿនមួយគ្រឿងផ្ទុកភ្ញៀវទេសចរចិន ២៦នាក់ ក្នុងនោះមានទាំងកុមារ ៣នាក់ និងអ្នកបើកបរនាវា ៥នាក់ផងដែរ បានផ្ទុះឆេះកាលពីថ្ងៃម្សិលមិញនេះ នៅក្នុងដែនទឹកស្ថិតក្នុងខេត្តក្រាប៊ី ជាខេត្តគោលដៅទេសចរណ៍មួយស្ថិតនៅភាគខាងត្បូងប្រទេសថៃ។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មានរដ្ឋចិនស៊ិនហួ។
ដោយបានដកស្រង់សម្ដីអគ្គកុងស៊ុលចិនប្រចាំនៅខេត្តសុងក្លា ទីភ្នាក់ងារព័ត៌មានស៊ិនហួ បានចុះផ្សាយបន្តថា ភ្ញៀវទេសចរ ១៤នាក់ និងនាវិក ២នាក់ បានរងរបួស ក្នុងនោះ ភ្ញៀវទេសចរចិន ៥នាក់ ស្ថិតក្នុងស្ថានភាពធ្ងន់ធ្ងរ។
ប្រធានមន្ទីរបង្ការ និងកាត់បន្ថយគ្រោះមហន្តរាយខេត្តក្រាប៊ី កៃសន ឃុនស៊ី បាននិយាយថា នាវាកម្សាន្តល្បឿនលឿននោះ កំពុងស្ថិតក្នុងដំណើរទៅលេងកោះភីភី នៅពេលវាជួបប្រទះបញ្ហានៅម៉ោង ១២ និង ៣០នាទីថ្ងៃអាទិត្យម្សិលមិញ។
មន្ត្រីថៃរូបនេះ ត្រូវបានដកស្រង់សម្ដី ដែលលោកបាននិយាយថា ជនរងគ្រោះ ៣នាក់រងរបួសធ្ងន់ធ្ងរ ៣នាក់ទៀតរងរបួសមធ្យម ខណៈដែលមួយចំនួនទៀតរងរបួសតិចតួច។
ភ្ញៀវទេសចររងរបួសទាំងនោះ ត្រូវបានរាយការណ៍ថា ត្រូវបានបញ្ជូនទៅព្យាបាលនៅមន្ទីរពេទ្យក្នុងខេត្តក្រាប៊ី និងខេត្តភូកេត៕
