ប្រធានាធិបតីអាមេរិកទី៤៥លោក ដូណាល ត្រាំ ចូលកាន់តំណែងកាល ពីថ្ងៃទី២០ខែមករា ឆ្នាំ២០១៧។ ក្រោយការចូលកាន់តំណែងភ្លាមនោះ ប្រធានាធិបតីរូបនេះ បានធ្វើឲ្យពិភពលោកចាប់អារម្មណ៍ត្រង់ថា លោករុះរើគោលនយោបាយ ឬកម្មវិធីមួយចំនួនរបស់ប្រធានាធិបតីមុន ហើយលោកបានចេញបទបញ្ជា និងបង្កើតច្បាប់ថ្មីៗដែលគេមើលឃើញថា ផ្តោតលើផល ប្រយោជន៍អាមេរិកជាធំ។
ការសម្រេចចិត្តរបស់លោកត្រាំពេលខ្លះ គេមើលឃើញថា មិនបានផ្តោតលើការគោរពសិទ្ធិមនុស្ស ឬបញ្ហាបរិស្ថាននោះទេ ហើយថែមទាំងមានការរើសអើងពូជសាសន៍ទៀតផង។
មន្ត្រីជាច្រើនគឺមិនក្រោម១០នាក់ទេត្រូវបានលោកត្រាំដកហូតតំណែងជាបន្តបន្ទាប់ដោយសារតែការមិនស្តាប់ ឬ ប្រឆាំងនិងគោលនយោបាយរបស់លោកក្នុងនោះ រួមទាំងរដ្ឋមន្ត្រីក្រសួង យុត្តិធម៌ មន្ត្រី នៅសេតវិមាន និងមន្ត្រីនៅចារកម្មផ្ទៃក្នុងFBIជាដើម។
លោក James Comey ជាឧទាហរណ៍មួយត្រូវបានលោកត្រាំ ដកចេញពីតំណែងជា ប្រធានFBIកាលពី ថ្ងៃទី៩ខែឧសភាឆ្នាំ២០១៧ ក្រោយពេលដែលលោក Comey ព្យាយាមស៊ើបអង្កេតករណី លោកត្រាំដោយសង្ស័យឃុបឃិតជាមួយចារកម្មរុស្ស៊ី ក្នុងការបន្លំលទ្ធ ផលបោះឆ្នោត កាលពីចុងឆ្នាំ២០១៦។ លោកត្រាំធ្លាប់ផ្ញើលិខិត និង ជួបផ្ទាល់ញឹកញាប់ ដើម្បីសុំឲ្យឈប់ស៊ើបករណីនេះ ប៉ុន្តែប្រធានFBIរូបនេះមិនព្រមឈប់ទេ។
កាលពីសប្តាហ៍មុន ចៅក្រមនៅទីក្រុង San Francisco លោក William Alsup បានសម្រេចឲ្យផ្អាកអនុវត្តបញ្ជារបស់លោកត្រាំ ក្នុងការចាប់បញ្ជូនពលរដ្ឋចូលដែនដីអាមេរិកខុសច្បាប់ត្រឡប់ទៅប្រទេសកំណើតពួកគេវិញ។ ដោយការមិនពេញចិត្តចំពោះសេចក្តីសម្រេចនេះ លោកត្រាំ ហៅតុលាការនោះថា អយុត្តិធម៌ធ្វើការសម្រេចដោយគ្មានការយល់ដឹង។
មានមន្ត្រីជាច្រើនទៀតរួមទាំងតំណាងរាស្ត្រនៅក្នុងគណបក្សជាមួយគ្នាក៏ហ៊ានប្រឆាំងជាមួយលោកត្រាំដោយបើកចំហដែរ។
តើកត្តាអ្វីខ្លះនាំឲ្យមន្ត្រីទាំងនេះហ៊ានប្រឆាំងជាមួយមេដឹកនាំរបស់ពួកគេ។
កត្តាបុគ្គល៖ អាចជាមូលហេតុចំបង ដោយសារតែពួកគេទទួលបានការអប់រំមានចំណេះដឹង ពិតប្រាកដ ទទួលបានតំណែងដោយមិនសូកប៉ាន់នោះ ពួកគេស្គាល់តួនាទីដឹងច្បាប់ បំពេញ ការ ងារដោយការទទួលខុសក្នុងពេលបច្ចុប្បន្ន និង អនាគត ។
ក្នុងតម្រូវការរបស់មនុស្សដែលលោក ម៉ាស្លូ ទស្សនវិជ្ជាជនជាតិអាមេរិកបានលើកឡើង ក៏បាន បញ្ជាក់ដែរថា តម្រូវការមនុស្សក្រៅពីការហូបចុកស្លៀកពាក់ និង សុវត្ថិភាពហើយ មនុស្សក៏ត្រូវការកិត្តិយសដែរ។ ដូច្នេះមន្ត្រីដែលហ៊ានចេញមុខប្រឆាំងគំនិតប្រធានាធិបតី ដោយមិនខ្លាចបាត់បង់តំណែង ឬ ផលប្រយោជន៍នេះ អាចជាដំណាក់កាលមួយ ដែលពួក គេត្រូវការកិត្តិយសទាំងពេលបច្ចុប្បន្ន និង ពេលស្លាប់ទៅគឺពលរដ្ឋរបស់ពួកគេនៅតែឲ្យតម្លៃ។
កត្តាច្បាប់ សង្គមមួយកាលណាមានជំនឿខ្លាំងលើព្រះឬ ខ្មោចព្រាយនោះ មនុស្សគោរព ព្រះខ្មោចព្រាយ ហើយបើសង្គមដែលមានបុគ្គលម្នាក់ខ្លាំងផុតលេខនោះមនុស្សឬ មន្ត្រីនានានឹងធ្វើតាម តែការនិយាយឬ ការបញ្ជារបស់មន្ត្រីទាំងនោះ។ រហូតដល់នៅសម័យអតីតមេដឹកនាំអាល្លឺម៉ង់ អាដុល ហ៊ីត្លែ គឺមន្ត្រីក្រោមបង្គាប់ចាត់ទុករាល់សម្តីចេញពីមាត់របស់មេដឹកនាំនេះ គឺជាច្បាប់។
ប៉ុន្តែនៅអាមេរិកអាចច្បាប់ប្រទេសជាធំទើបមន្ត្រីផ្សេងៗធ្វើការសំឡឹងមើលច្បាប់ ដោយមិន សំឡឹងមើលមុខប្រធានាធិបតីនោះទេ។
ប្រព័ន្ធយុត្តិធម៌ ស្ថិតនៅក្នុងលក្ខខណ្ឌឯករាជ្យ អ្នកមានអំណាចមិនជ្រៀតជ្រែកប្រើប្រាស់ តាមតែចិត្តនឹកឃើញបាននោះទេ។ ចំណុចនេះ ធ្វើឲ្យមន្ត្រីហ៊ានប្រឆាំងថ្នាក់ដឹកនាំ គឺយ៉ាង ហោច ណាស់បាត់បង់តួនាទី និងផលប្រយោជន៍តែប៉ុណ្ណោះ គឺមិនមានទោសទណ្ឌ ផ្សេងៗ ទេ។
នៅបណ្តាប្រទេសដែលមានប្រព័ន្ធយុត្តិធម៌ខ្សោយនោះគឺមន្ត្រីថ្នាក់ក្រោមកម្រហ៊ានជំទាស់ និងមេដឹកនាំណាស់ព្រោះថា ក្រៅពីបាត់បង់តំណែងអាចប្រឈមជាប់ទោសផ្សេងៗ បើមិន មានកំហុសក៏បង្កើតមូលហេតុផ្សេងដើម្បីចាប់ដែរ។ បើសិនចង់ជំទាស់គឺត្រូវបោះបង់តួនាទី ហើយរត់គេចទៅក្រៅប្រទេសជាមុនសិន៕
