យ៉ាងហោចណាស់មនុស្សជាង៧០នាក់ បានរងរបួសនៅឥណ្ឌូនេស៊ីកាលពីថ្ងៃចន្ទដើមសប្តាហ៍នេះ ដោយសារការបាក់អគារផ្សារភាគហ៊ុនផ្នែកជាន់ឡៅតឿ។
តាមរូបភាពវីឌីអូបង្ហាញពីកាមេរ៉ាសុវត្ថិភាព គឺមនុស្សមួយក្រុមបានដើរដល់ទីតាំងមួយនៃអគារហើយក៏នាំគ្នាឈប់ មួយសន្ទុះក្រោយមកទៀតក៏បានបាក់តែម្តង។ នេះបើតាមទីភ្នាក់ងារព័ត៌មាន Reuter។
ក្រោយកើតហេតុភ្លាមៗសមត្ថកិច្ចបានបិទទីតាំងនោះ ហើយរៀបចំជម្លៀសមនុស្សចេញពីទីនោះ។ របាយការណ៍របស់សមត្ថកិច្ចឲ្យដឹងថា ភាគច្រើននៃអ្នករងរបួសទាំងនោះគឺជាក្រុមនិស្សិត។
សមត្ថកិច្ចឥណ្ឌូនេស៊ីបានបញ្ជាក់ថា ហេតុការណ៍នេះបានបណ្តាលឲ្យមានអ្នករងរបួសចំនួន៧០នាក់ គឺមិនមានអ្នកប៉ះពាល់ដល់អាយុជីវិតនោះទេ។
អ្នកនាំពាក្យនគរបាលនៅចាការតាលោក Argo Yuwono ថ្លែងថា អ្នករងរបួសភាគច្រើនគឺ របួសដៃ និង របួសជើង៕