ឧបនាយករដ្ឋមន្ត្រីថៃលោក ប្រាវីត វុងសូវ៉ាន ជាបុគ្គលមានអំណាចទី២នៅក្នុងរបបយោធាថៃស្ថិតនៅក្រោមការស៊ើបអង្កេតលើនាឡិកាទំនើបរបស់លោកចំនួន២៥ មានតម្លៃ១លាន២សែនដុល្លារអាមេរិក ដោយសង្ស័យពាក់ព័ន្ធករណីអំពើពុករលួយ។
ឧបនាយករដ្ឋមន្ត្រីរូបនេះ រងការចោទថា ជាអ្នកដែលចូលចិត្តនាឡិកាថ្លៃទំនើបៗ។ ជុំវិញបញ្ហានេះអ្នកប្រើប្រាស់ហ្វេសប៊ុកនៅក្នុងសង្គមថៃកំពុងតែរិះគន់ ហើយទាមទារឲ្យចុះចេញពីតំណែងនឹងបើកការស៊ើបអង្កេត។នេះបើតាមទីភ្នាក់ងារព័ត៌មានAFP។
តាំងពីខែធ្នូមកផេកហ្វេសប៊ុកឈ្មោះ CSI LA រាប់នាឡិកាដែលប្រាវីត ប្រើប្រាស់ប្រមាណ២៥នាឡិកា ហើយក្នុងនោះមាននាឡិការបស់ក្រុមហ៊ុនម៉ាកល្បីៗដូចជា ម៉ាក Rolexes ចំនួន១១ ម៉ាក Patek Philippes ចំនួន៨ និង ម៉ាក Rechard Millesចំនួន៣។ នាឡិកាម៉ាកល្បីបីប្រភេទតែចំនួន២១គ្រឿងក្នុងចំណោមនោះ តម្លៃដល់១លាន២សែនដុល្លារ។ បញ្ហានេះនាំឲ្យមានការចោទសួរថា ប្រាក់ខែឧបនាយករដ្ឋមន្ត្រីរូបនេះគ្រប់គ្រាន់ក្នុងការទិញនាឡិកាថ្លៃៗទាំងនេះទេ?
លោកប្រា វីត វុងសូវ៉ាន បានថ្លែងបកស្រាយថា នាឡិកាទាំងនេះគឺលោកខ្ចីពីមិត្តភ័ក្តិហើយថា នឹងសងត្រឡប់ទៅកាន់ម្ចាស់គេវិញនៅពេលខាងមុខ។ ប៉ុន្តែក្រុមអ្នកដែលប្រើប្រាស់ហ្វេសប៊ុកចោទប្រកាន់នោះអះអាងថា នាឡិកាទាំងនោះស្ថិតនៅក្នុងបញ្ជីកម្មសិទ្ធិផ្ទាល់ខ្លួនរបស់ លោក វុងសូវ៉ាន។
ករណីនេះស្ថិតនៅក្នុងការស៊ើបរបស់ភ្នាក់ងារប្រឆាំងអំពើពុករលួយរបស់ថៃ បើទោះជាមានការអះអាងថា ខ្ចីគេក៏ដោយក៏ការស៊ើបនៅតែបន្ត៕
