លោក ត្រាំ គ្រោងផ្តល់សញ្ញាតិឲ្យជនអន្តោប្រវេសន៍១,៨លាននាក់​

រដ្ឋាភិបាលសហរដ្ឋអាមេរិកក្រោមការដឹកនាំរបស់ប្រធានាធិបតី ដូណល ត្រាំកំពុងតែរៀបចំគម្រោងក្នុងការផ្តល់សញ្ញាតិឲ្យជនអន្តោប្រវេសន៍ខុសច្បាប់ចំនួន​១លាន៨សែននាក់ ជាថ្នូរទៅនឹងការស្នើឲ្យព្រឹទ្ធសភាអនុម័តកញ្ចប់ថវិកាសម្រាប់យកទៅសាងសង់ជញ្ជាំងព្រំដែនជាមួយប្រទេសម៉ិចស៊ិក។​

មន្ត្រីសេតវិមានថ្លែងថា គម្រោងនេះ​លោកត្រាំនឹងយកទៅជជែកជាមួយជាមួយគណបក្សប្រជាធិបតេយ្យ ដើម្បីស្នើថវិកាជាតិចំនួន​២៥ប៊ីលានដុល្លារ យកទៅសាងសង់ជញ្ជាំងព្រំដែនជាមួយប្រទេសម៉ិចស៊ិច។ នេះបើតាមសារព័ត៌មាន BBC។​

កាលពីថ្ងៃទី២០ខែមករា រដ្ឋាភិបាលរបស់លោកត្រាំ បានជាប់គាំងថវិកាមិនអាចដំណើរការបានដោយសារព្រឹទ្ធសភាមិនអនុម័តច្បាប់ថវិកា។ បន្ទាប់មកមានការដោះស្រាយបើកឲ្យចាយថវិកាបណ្តោះអាសន្នដល់ថ្ងៃទី៦ខែកុម្ភៈ នៅក្នុងអំឡុងពេលនេះ បើលោកដូណល ត្រាំមិនអាចរកចំណុចឯកភាពគ្នាឃើញទេ នឹងមានវិបត្តិជាប់គាំថវិកាបន្តទៀត៕