លោកឌូទើតេ ប្រាប់អ៊ុងសានស៊ូជីថាកុំខ្វល់រឿងសិទ្ធិមនុស្ស

មេដឹកនាំហ្វីលីពីនលោក រ៉ូឌ្រីហ្គោ ឌូទើតេ បានប្រាប់ទៅមេដឹកនាំមីយ៉ាន់ម៉ាថា មិនបាច់ខ្វល់រឿងការលើកឡើងបញ្ហាសិទ្ធិមនុស្សនោះទេ ដោយលោកចាត់ទុកថា នោះគ្រាន់តែជាសកម្មភាពរំខានដល់ការងារដឹកនាំប្រទេសតែប៉ុណ្ណោះ។​

នៅក្នុងកិច្ចប្រជុំអាស៊ាន-ឥណ្ឌា កាលពីថ្ងៃសុក្រម្សិលមិញ លោកឌូទើតេ​ថ្លែងថា លោក អាណិតលោកស្រី អ៊ុង សានស៊ូជី ដែលបច្ចុប្បន្ន​កំពុងតែរងគំនាបពីសហគមន៍អន្តរជាតិ ដែលថ្កោលទោសថា បានរំលោភសិទ្ធិជនជាតិភាគតិចរ៉ូហ៊ីងយ៉ា។​ នេះបើតាមការចុះផ្សាយរបស់Asia Correspondent។​

លោក ឌូទើតេ លើកឡើងថា មិនបាច់ខ្វល់លើការរិះគន់នានារបស់សកម្មជនការងារសិទ្ធិមនុស្សទេគឺ ផ្តោតតែលើការងារអភិវឌ្ឍន៍ប្រទេសបានហើយ លោកចាត់ទុកសំឡេងក្រុមការពារសិទ្ធិមនុស្សជាសំឡេងរំខាន។​

បច្ចុប្បន្នលោកស្រី អ៊ុង សានស៊ូជី កំពុងរងការរិះគន់ថា រំលោភសិទ្ធិលើជនជាតិដើមភាគតិចរ៉ូហ៊ីងយ៉ា ចំពោះហិង្សាកើតឡើងកាលពីឆ្នាំ២០១៧។

ចំណែក លោក ឌូទើតេ ក៏កំពុងរងការថ្កោលទោសដែរ ចំពោះការសម្លាប់មនុស្សក្រៅប្រព័ន្ធច្បាប់រាប់ពាន់នាក់ ជុំវិញការបង្ក្រាបគ្រឿងញៀន។​