អាជ្ញាធរចិនបានបញ្ជាទៅបណ្ដាញទំនាក់ទំនងសង្គមធំមួយ ឲ្យទប់ស្កាត់នូវអ្វីដែលចិនហៅថា «មាតិកាគ្រោះថ្នាក់» ឲ្យកាន់តែមានប្រសិទ្ធភាព ខណៈដែលចិនកំពុងតែត្រួតលើការបញ្ចេញមតិនៅលើបណ្ដាញអ៊ីនថឹណិត សូម្បីតែបទចម្រៀងរ៉េប រូបត្លុក កំប្លែង និងរឿងចចេចចចូចរបស់តារាផងដែរ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP បានចុះផ្សាយបន្តថា យុទ្ធនាការនេះ មិនត្រឹមតែមានបំណងទប់ស្កាត់សំឡេងរិះគន់ទេ ប៉ុន្តែ ក៏ដើម្បីធានាថា ប្រព័ន្ធផ្សព្វផ្សាយទាំងអស់ បម្រើដល់ «ទិសដៅសង្គមនិយម»ផងដែរ។
រដ្ឋបាលគ្រប់គ្រងប្រព័ន្ធអ៊ីនថឹណិតចិន បានចោទបណ្ដាញទំនាក់ទំនងសង្គម Weibo ថា មិនគោរពតាមច្បាប់ ដោយបណ្ដោយឲ្យអ្នកប្រើប្រាស់ផុសមាតិកាដែលធ្វើឲ្យសាធារណជនយល់ខុស ភាសាអសុរស និងពាក្យពេចន៍រើសអើងជនជាតិភាគតិច។
ចិនគឺជាប្រទេសមួយក្នុងចំណោមប្រទេសនានាលើពិភពលោក ដែលគ្រប់គ្រងលើប្រព័ន្ធអ៊ីនថឹណិតយ៉ាងតឹងតែង ចាប់តាំងពីលោក ស៊ី ជិនពីង ឡើងកាន់អំណាចកាលពីឆ្នាំ២០១២មក៕