ចំនួនក្មេងស្រីដែលគេដឹងថា រងការបំពានផ្លូវភេទពីវេជ្ជបណ្ឌិតអាមេរិកនៅកីឡាកាយសម្ព័ន្ធកើនឡើងដល់ចំនួន២៦៥នាក់ ខណៈតុលាការកំពុងតែបន្តនីតិវិធីលើសំណុំរឿងនេះ។
ចៅក្រមនៅរដ្ឋមីជីហ្គេន ថ្លែងថា ក្នុងសវនាការកាលពីថ្ងៃពុធម្សិលមិញ កើនឡើងក្មេងស្រីជាជនរងគ្រោះកើនដល់២៦៥នាក់ ហើយថា វេជ្ជបណ្ឌិត Larry Nassar ដែលរងការចោទប្រកាន់នោះប្រឈមទៅនឹងទោសទណ្ឌបន្ថែមទៀត។
កាលផ្ទុះរឿងនេះលើកដំបូងគឺមានក្មេងស្រីរងគ្រោះតែ៦៥នាក់ បន្ទាប់មកកាលពីសប្តាហ៍មុនមានជាង១៦០នាក់ ហើយនៅសប្តាហ៍នេះ ជនរងគ្រោះបានចេញមុខនៅបន្ទប់សវនាការកើនដល់២៦៥នាក់។
ក្នុងសវនាការកាលពីសប្តាហ៍មុន វេជ្ជបណ្ឌិត Nassar មានវ័យ៥៤ឆ្នាំរូបនេះ ប្រឈមជាប់ពន្ធនាគារពី៤០ទៅ១៧៥ឆ្នាំ។ ចៅក្រមកាន់សំណុំរឿងថ្លែងថា មិនអាចអនុញ្ញាតឲ្យវេជ្ជបណ្ឌិតរូបនេះមានឱកាសដើរចេញពីពន្ធនាគារទេ ព្រោះអាចបង្កគ្រោះថ្នាក់ជាថ្មីទៀត៕