ចិនបានជំរុញទៅអាមេរិកឲ្យទម្លាក់ចោលនូវអ្វីដែលចិនហៅថា «ចិត្តសាស្ត្រសង្គ្រាមត្រជាក់» និងមិនត្រូវយល់ខុសចំពោះការកសាងសមត្ថភាពយោធារបស់ខ្លួន បន្ទាប់ពីក្រុងវ៉ាស៊ីងតោន បានចេញផ្សាយឯកសារមួយកាលពីថ្ងៃសុក្រ ដែលបានគូសវាសផែនការសម្រាប់ពង្រីកសមត្ថភាពនុយក្លេអ៊ែររបស់ខ្លួនដើម្បីទប់ទល់នឹងប្រទេសដទៃ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានចុះផ្សាយបែបនេះ ដោយបានអានសេចក្ដីថ្លែងការណ៍របស់ក្រសួងការពារជាតិចិននៅថ្ងៃនេះ ដែលបានលើកឡើងថា សន្តិភាព និងការអភិវឌ្ឍ គឺជានិន្នាការសកលដែលមិនអាចឆ្លាស់គ្នាបាននោះឡើយ។
ក្រសួងការពារជាតិចិន បានលើកឡើងបន្តថា អាមេរិក ដែលជាប្រទេសមានអាវុធនុយក្លេអ៊ែរធំបំផុតនៅលើពិភពលោកនោះ គួរតែប្រកាន់យកគំនិតផ្ដួចផ្ដើមដើរតាមនិន្នាការ ជំនួសឲ្យការប្រឆាំងនឹងនិន្នាការនេះ។
ការត្រួតពិនិត្យមើលឡើងវិញអំពីគោលនយោបាយនុយក្លេអ៊ែររបស់អាមេរិក ក៏បានបញ្ឆេះកំហឹងដល់រុស្ស៊ីផងដែរ ដែលចាត់ទុកផែនការនោះជាការប្រឈមមុខនឹងគ្នា និងបង្កឲ្យមានក្ដីបារម្ភថា ផែនការនោះអាចបង្កើនហានិភ័យនៃការយល់ច្រឡំគ្នារវាងប្រទេសទាំងពីរ។
យោធាអាមេរិកបានចាត់ទុកការប្រឈមមុខទៅនឹងចិន និងរុស្ស៊ី ជាចំណុចស្នូលនៃយុទ្ធសាស្ត្រការពារជាតិថ្មីដែលត្រូវបានបង្ហាញឲ្យដឹងនៅក្នុងខែនេះ ខណៈចិន និងរុស្ស៊ី ត្រូវបានគេហៅថា «មហាអំណាចកុម្មុយនីស្តជំនាន់ថ្មី»៕
