កូរ៉េខាងជើងមានឆន្ទៈខ្លាំងណាស់ក្នុងការរៀបចំការចរចាជាមួយអាមេរិក។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters ដែលបានដកស្រង់ប្រភពពីវិមានបៃតងរបស់ប្រធានាធិបតីកូរ៉េខាងត្បូង។
Reuters បានចុះផ្សាយបែបនេះ ចំពេលដែលគណៈប្រតិភូកូរ៉េខាងជើងបានទៅចូលរួមក្នុងពិធីបិទព្រឹត្តិការណ៍កីឡាអូឡាំពិកកាលពីថ្ងៃម្សិលមិញនេះ។
វិមានបៃតង បាននិយាយក្នុងសេចក្ដីប្រកាសព័ត៌មានមួយថា នៅក្នុងជំនួបមួយជាមួយប្រធានាធិបតីកូរ៉េខាងត្បូង លោក មូន ជែអ៊ីន គណៈប្រតិភូកូរ៉េខាងជើង បានឯកភាពថា ជំនួបពិភាក្សារវាងកូរ៉េទាំងពីរ និងទំនាក់ទំនងកូរ៉េខាងជើង-អាមេរិក គួរតែកែលម្អរួមគ្នា។
ក្រុងព្យុងយ៉ាងបាននិយាយជាញឹកញាប់ថា ខ្លួនមានឆន្ទៈចរាចដោយគ្មានលក្ខខណ្ឌ ប៉ុន្តែ ក្រុងវ៉ាស៊ីងតោនបញ្ជាក់ថា ខ្លួនត្រូវតែចាត់វិធានការរឹងមាំឆ្ពោះទៅរកការរំសាយកម្មវិធីនុយក្លេអ៊ែរ។
អាមេរិកបាននិយាយក្នុងសេចក្ដីប្រកាសព័ត៌មានកាលពីថ្ងៃម្សិលមិញថា ការចរចាជាមួយកូរ៉េខាងជើង អាចនាំទៅរក«ផ្លូវដ៏ភ្លឺស្វាងថែមទៀត»សម្រាប់របបឯកោមួយនេះ ប៉ុន្តែ ត្រូវប្រុងប្រយ័ត្នថា ជំនួបចរចាណាមួយ ត្រូវតែនាំទៅរកលទ្ធផលរំសាយកម្មវិធីអាវុធនុយក្លេអ៊ែរ៕
