គណបក្សកុម្មុយនីស្តចិនព្យាយាមពន្យល់ប្រជាពលរដ្ឋថា ការធ្វើកំណែទម្រង់ដឹកនាំដោយមិនកំណត់អាណត្តិប្រធានាធិបតីនោះ មិនមែនមានន័យថា លោក ស៊ី ជីនពីង ( Xi Jinping) កាន់តំណែងអស់មួយជីវិតនោះទេ។
កាលពីថ្ងៃអាទិត្យគណបក្សកុម្មុយនីស្ត បានស្នើឲ្យមានការកែប្រែរដ្ឋធម្មនុញ្ញដោយលុបបចោល ការកំណត់ឲ្យបុគ្គលម្នាក់កាន់តំណែងជាប្រធានាធិបតីបានតែ២អាណត្តិឬ ១០ឆ្នាំ ដើម្បីបើកផ្លូវឲ្យលោក ស៊ី ជីនពីង កាន់តំណែងដោយមិនកំណត់ពេល។
ក្រោយមកមានការរិះគន់ជាច្រើនពីមហាជននៅក្នុងប្រទេសចិន ដោយពួកគេប្រើប្រាស់បណ្តាញសង្គម ដើម្បីបញ្ចេញមតិដោយបារម្ភថា ប្រទេសចិនកំពុងងាកទៅរកការគ្រប់គ្រងផ្តាច់ការដូចកូរ៉េខាងជើង។
នៅថ្ងៃនេះ សារព័ត៌មានរដ្ឋចិន People’s Daily ចុះផ្សាយថា ការធ្វើកំណែទម្រង់នោះគ្រាន់តែជាការឲ្យតម្លៃខ្ពស់លើគំនិតមេដឹកនាំ ប៉ុន្តែមិនមែនមានន័យថា ដូរប្រព័ន្ធនៅក្នុងគណបក្ស និង នៅថ្នាក់ដឹកនាំជាតិនោះទេ ហើយក៏មិនមានមានន័យឲ្យមេដឹកនាំកាន់តំណែងអស់មួយជីវិតដែរ គឺត្រូវមានការពិភាក្សាបន្ត៕