អតីតតារាម៉ូឌែលជាជំនួយការរបស់លោក ដូណាល ត្រាំ និងជានាយកផ្នែកទំនាក់ទំនងនៃសេតវិមាន លោកស្រី ហូប ហ៊ីក (Hope Hicks) បានលាលែងចេញពីតំណែងដោយមិនបានពន្យល់មូលហេតុច្បាស់លាស់នោះទេ។
អតីតតារាម៉ូឌែលវ័យ២៩ឆ្នាំរូបនេះ ក៏ធ្លាប់ជាបុគ្គលិកនៅក្នុងក្រុមហ៊ុន របស់លោក ត្រាំ ជាច្រើនឆ្នាំ ហើយក៏បានចូលកាន់តែងជាជំនួយការរបស់លោក ត្រាំ កាលពីខែសីហាឆ្នាំ២០១៧ ទាំងនាងមិនធ្លាប់មានបទពិសោធន៍ក្នុងកិច្ចការនយោបាយ។ លោកស្រី ហូប ជានាយកផ្នែកការទំនាក់ទំនងទី៤ហើយនៅក្នុងរដ្ឋការរបស់លោកត្រាំ ដែលជ្រើសតាំងហើយបញ្ឈប់វិញជាបន្តបន្ទាប់។
ជំនួយការរបស់លោក ត្រាំ រូបនេះ បានថ្លែងប្រាប់ក្រុមការងារជាមួយនាងថា ការឈប់នេះ ដោយសារនាងបានធ្វើកិច្ចការដែលចង់ធ្វើនៅក្នុងសេតវិមានរួចហើយ។ លោកស្រី ហូប ថ្លែងថា ការលាឈប់នេះ មិនពាក់ព័ន្ធជាមួយការផ្តល់សក្ខីកម្មដល់ក្រុមចារកម្មកាលពីថ្ងៃអង្គារនោះទេ។
លោកស្រី ហូប ត្រូវបានរាយការណ៍ថា កុហកជុំវិញការផ្តល់សក្ខីកម្មឲ្យចារកម្មលើករណីរុស្ស៊ីជ្រៀតជ្រែកលើការបោះឆ្នោតនៅសហរដ្ឋអាមេរិក។
កាលពីយុទ្ធនាការឃោសនាបោះឆ្នោតលោក ស្រី ហូប ជាអគ្គលេខាធិការផ្នែកព័ត៌មានរបស់លោក ដូណល ត្រាំ។
អ្នកនាំពាក្យសេតវិមានលោកស្រី សារ៉ា សេនដឺ (Sarah Sanders) ថ្លែងថា មិនទាន់បានកំណត់ថ្ងៃជាក់លាក់ដែលលោកស្រី ហូប ត្រូវចាកចេញពីការងារនេះនៅឡើយ៕