ប្រទេសជាដៃគូពាណិជ្ជកម្មសំខាន់ៗជាមួយសហរដ្ឋអាមេរិកកំពុងតែបង្ហាញប្រតិកម្មចំពោះករណីដែលលោក ដូណាល ត្រាំ ប្រកាសពីការដំឡើងពន្ធនាំចូលប្រភេទដែកថែប និង អាលុយមីញ៉ូម។
ប្រទេសកាណាដា និងសហភាពអឺរ៉ុប ថ្លែងថា ពួកគេនឹងជួបបញ្ហាចំពោះវិធានការតឹងរឹងការដំឡើងពន្ធរបស់អាមេរិកនេះ។ ចំណែកប្រទេស ម៉ិចស៊ិក ចិន និង ប្រេស៊ីល បញ្ជាក់ថា ពួកគេកំពុងតែថ្លឹងថ្លែងរកចំណាត់ការសងសឹកជាមួយអាមេរិកវិញ។ នេះបើតាមសារព័ត៌មាន BBC។
លោកត្រាំ បានសរសេរក្នុងបណ្តាញសង្គម Twitter របស់លោកថា កន្លងមកអាមេរិក ជួបភាពអយុត្តិធម៌ក្នុងការធ្វើពាណិជ្ជកម្មមិនស្មើភាពគ្នាជាមួយប្រទេសជាមិត្ត។ លោកបញ្ជាក់ថា ពន្ធនាំចូលដែកថែបដំឡើងដល់២៥% ចំណែកអាលុយមីញ៉ូមដំឡើងដល់១០%។
អ្នកតាមដានមួយចំនួនលើកឡើងថា ការដំឡើងពន្ធនេះនឹងបរាជ័យដោយសារប៉ះពាល់ដល់ការស្វែងរកការងារធ្វើ និង ថ្លៃឡើងខ្ពស់ដល់អតិថិជនទិញយកទៅប្រើប្រាស់។
បញ្ហាទាំងនេះ ធ្វើឲ្យទីផ្សារភាគហ៊ុននៅជប៉ុននៅព្រឹកនេះគឺ ក្រុមហ៊ុន Nikkei បានធ្លាក់ចុះ២% ក្រុមហ៊ុនយក្សផលិតរថយន្ត Toyota ធ្លាក់ចុះជាង២% និងក្រុមហ៊ុនដែកថែប Nipponធ្លាក់ចុះ៤% បន្ទាប់ពីប្រទេសនានាមានប្រតិកម្មជាមួយអាមេរិក។
Toyota ប្រកាសថា ការសម្រេចចិត្តរបស់សហរដ្ឋអាមេរិកនឹង ប៉ះពាល់យ៉ាងធ្ងន់ធ្ងរដល់ក្រុមហ៊ុនផលិតរថយន្តអ្នកផ្គត់ផ្គង់រថយន្តនិងអ្នកប្រើប្រាស់រថយន្ត។
ប្រធានគណៈកម្មការអឺរ៉ុបលោក Jean-Claude Juncker ថ្លែងថា ការដំឡើងពន្ធនេះ ធ្វើឲ្យទីផ្សារការងារនៅអឺរ៉ុបជូបហានិភ័យ។លោកថា ការសម្រេចនេះ ធ្វើឡើងដោយមិនស្មើភាពទេ ហើយនឹងមានប្រតិកម្មពីក្រុមហ៊ុនផ្សេងៗទៀតមិនខានទេ។
ប្រទេសកាដាណា ជាប្រទេសដែលនាំដែកថែប និង អាលុយមីញ៉ូមច្រើនជាងទៅអាមេរិក។ រដ្ឋមន្ត្រីពាណិជ្ជកម្មកាណាដាលោក Francois-Philippe Champagne ថ្លែងថា ការដំឡើងពន្ធនេះ មិនអាចទទួលយកបានទេ។
ប្រទេសប្រស៊ីល អាល្លឺម៉ង់ ចិន អូស្ត្រាលី និង កូរ៉េខាងត្បូងជាដើម កំពុងតែពិចារណាក្នុងការស្វែងរកដំណោះស្រាយលើបញ្ហាអាមេរិកកំណត់ពន្ធនាំចូលនេះ។
បច្ចុប្បន្នសហរដ្ឋអាមេរិកកំពុងតែនាំចូលដែកថែប ៤ដងច្រើនជាងការនាំចេញ ដែលការនាំចូលទាំងនោះយកពីប្រទេសជាង១០០។
ក្រសួងថាមពលរបស់អាមេរិក ប្រកាសថា ឧស្សាហកម្មដែកថែប កំពុងតែស្តាឲ្យមានភាពប្រើសើរឡើងវិញក្រោយពេលដែលមានវិបត្តិសេដ្ឋកិច្ចធ្ងន់ធ្ងរកាលពីឆ្នាំ២០០៨៕