លោកនាយករដ្ឋមន្រ្តីហ៊ុន សែន ថាទូរទស្សន៍បាយ័នដែលជារបស់កូនស្រីច្បងរបស់លោកបានឧបត្ថម្ភជា ស្ទីលយោ(Studio)ទំនើបៗដល់ទូរទស្សន៍ជាតិ ទទក ដើម្បីពង្រឹងគុណភាពនៃការផ្សាយ។
លោកហ៊ុន សែន លើកឡើងបែបនេះក្នុងពិធីជួបសំណេះសំណាល ជាមួយកម្មករ កម្មការិនីចំនួន ១៤ ០២៥នាក់ក្នុងខេត្តព្រះសីហនុ នាព្រឹកថ្ងៃទី ០៤ ខែ មីនានេះ។
លោក ហ៊ុន សែន បានលើកឡើងថា៖ «ឥឡូវខាងបាយ័នកំពុងផ្ដល់ជំនួយឲ្យទូរទស្សន៍ជាតិ។ ម៉ាស៊ីនផ្សាយ និង ឧបកណ៍ផ្សាយមួយចំនួនខាងទូរទស្សន៍បាយ័នជួយ ដោយសារតែ ថវិកានឹងខ្ញុំចង់ឲ្យ វា(ការផ្សាយ)មានល្បឿនលឿនបន្តិច ដើម្បីរុញទូរទស្សន៍ជាតិមានម៉ាស៊ីនផ្សាយថ្មី។»
ប៉ុន្តែលោក ហ៊ុន សែនក៏បានរិះគន់ចំៗចំពោះការផ្សាយព័ត៌មានរបស់ទូរទស្សន៍ជាតិថា បានផ្សាយព័ត៌មានមិនពិត ទាក់ទងនឹងសកម្មភាពចុះជួបកម្មកររបស់លោកកាលពីម្សិលមិញនៅក្រុងព្រះសីហនុដែលទូរទស្សន៍ជាតិបានផ្សាយថាលោក ជួបសំណេះសំណាលកម្មករនៅខេត្តកំពង់ស្ពឺ។
ជាមួយគ្នានោះលោក ហ៊ុន សែនក៏បានលើកឡើងដោយបង្អាប់ចំៗ ថាទូរទស្សន៍ដែលមានគុណភាពនៃការផ្សាយយ៉ាប់ជាងគេ គឺទូរទស្សន៍ជាតិ ទទក នេះឯង៕